বানপানীৰ ভাৱনা - FLOOD FESTIVAL

অসম নামৰ ৰাজ্যখনৰ প্ৰায় কেইখন জিলাতে বৰ্তমান বানপানীৰ উৎসৱ চলি আছে..

কেৱল বানপানীৰ সময়তহে  হিয়া ঢাকুৰা আমিবোৰে

ঘৰৰ কাষৰে নদীখনৰ মথাউৰিকেইটা ভালকৈ বন্ধোৱা হৈছে নে নাই? মথাউৰি নিৰ্মাণত বিজ্ঞানসন্মত পদ্ধতি অৱলম্বন কৰিছে নে কেৱল বালিৰ বস্তাৰে মথাউৰি নিৰ্মাণ সামৰিছে? মন্ত্ৰী, এমএলৰ ঘনিষ্ঠজনৰপৰা গাঁৱৰে চাব-কন্ট্ৰেক্ট পোৱা দদাইদেউ-খুৰাদেউ বা চিনাকী মানুহজনে মথাউৰিটো নিৰ্মাণ শেষ হোৱাৰ আগতেই কেনেকৈ নতুন গাড়ী এখন হঠাতে কিনিলে? 

বানপানীৰ নামত প্ৰতি বছৰে ব্যয় কৰা চৰকাৰৰ কোটিৰ ঘৰৰ পইচাবোৰ প্ৰকৃততে কাৰ পকেটত সোমাই? 

বানপানী নিৰ্মূলৰ কিবা বিজ্ঞানসন্মত পৰিকল্পনা ৰাজ্য চৰকাৰৰ বান নিয়ন্ত্ৰণ বিভাগৰ হাতত আছেনে? যদি নাই বিভাগটো কিয় আৰু কাৰ স্বাৰ্থত জীয়াই ৰখা হৈছে?

- ইত্যাদি ধৰণৰ প্ৰশ্নবোৰ মুখ খুলি দহজনৰ আগত ৰাজহুৱাকৈ কৰাৰ সাহস কৰিম গৈ নে কেতিয়াবা?? চৰকাৰ তথা প্ৰশাসনৰ মূৰব্বীসকলক কেতিয়াবা জবাবদিহি কৰিবলৈ শিকম নে বাৰু!! 

বাকী বানপানীৰ অভিজ্ঞতাৰ কথা কিনো ক'ম!!!

৫ম শ্ৰেণীৰপৰা বানপানীৰ সৈতে সহাৱস্থান কৰাৰ অভিজ্ঞতাৰে অভিজ্ঞ হৈ একেবাৰে শিক্ষা লোৱাৰ অজুহাতত ঘৰৰপৰা উলাই অহাৰ দিনটোতো একাঠুঁ পানীৰ মাজেৰহে ঘৰৰপৰা উলাই আহিব লগা হৈছিল। দেউতাৰ সৈতে চাইকেলৰ হেণ্ডেলত বেগ এটাত দুটামান দৰকাৰী বয়বস্তু লৈ আহিব লগা হৈছিল বানপানীৰ মাজেৰে প্ৰায় ৫ কিলোমিটাৰমান। অলপ দূৰ নাৱেৰে আহি আকৌ অলপমান খোজকাঢ়িহে ৰাতিৰ নৈশবাছখন পাইছিলোহি।

সময় আগবঢ়াৰ লগে লগে বানপানীৰ প্ৰকোপ লাহে লাহে কমিল আমাৰ ঠাইবোৰত। তাৰ বিপৰীতে ৰাজ্যৰ নতুন নতুন ঠাইলৈ আনিক কেতিয়াও বানপানী নোহাৱা ঠাইখনলৈ কিন্তু বানপানীৰ প্ৰসাৰ বাঢ়িল।

কৃত্ৰিম হ'লেও বানপানীয়ে বৰ্তমান মোৰ ৰাজ্যৰ ৰাজধানীখনকো এৰা নিদিয়া হ'ল!!

কিন্তু ইমানৰ পিছতো আমি সাধাৰণ ৰাইজে বানপানীৰ সময়খিনিৰ বাহিৰে বাকী সময়ত নিৰ্লিপ্ত হৈ থকাতোৱে আমাৰ দায়িত্বহীনতাকে প্ৰতিপন্ন নকৰেনে বাৰু!! 

(২০ জুন ২০২২/সৰভোগ,বৰপেটা)

অপ্ৰাসংগিক

ক) 

বিশ্বৰ সংবাদ মাধ্যমৰ বিভিন্ন তৰ্ক বিতৰ্কৰ মাজতে ৪৪ বিলিয়ন ডলাৰ ধনৰ বিনিময়ত, মানে ভাৰতীয়া টকাৰ হিচাপত ৩৩৭৩৪৯,৩৬,০০,০০০ কোটি টকাত বৰ্তমান বিশ্বৰ অন্যতম জনপ্ৰিয় সামাজিক যোগাযোগ মাধ্যম টুইটাৰক ইলন মাস্কে ক্ৰয় কৰাৰ চৰ্চা সৰ্বত্ৰে.. যিজন মাস্কৰ চিন্তা চৰ্চা বৰ্তমান পৃথিৱীতকৈ সদায় দুখোজ আগুৱাই থকা বুলি সকলোৱে একেমুকে স্বীকাৰ কৰে.. সেইজন ব্যক্তিৰ এই ক্ৰয়ৰ অন্তৰালতো নিশ্চয় কিবা এটা নিৰ্দিষ্ট কাৰণ আছে। সকলো জল্পনা কল্পনাৰ ওৰ পেলাই সময়ত সেয়া সকলোৰে দৃষ্টিগোচৰ হ'ব। 

কিন্তু হিন্দু মুছলমানৰ নামত ভাৰতবৰ্ষত বৰ্তমান যি এক ভয়ানক পৰিৱেশৰ সৃষ্টি হৈছে তাত মূল কাৰক হিচাপে ক্ৰিয়া কৰাৰ অন্তৰালত যে ধৰ্ম আৰু ৰাজনীতিয়েই মূল সেয়া বহলাই কাকো নিশ্চয় কোৱাৰ প্ৰয়োজন নাই.. কিন্তু এই ৰাজনৈতিকভাৱে প্ৰৰোচিত ধৰ্মীয় উন্মাদনাত মত্ত ভাৰতীয় ধৰ্মগুৰু আৰু ৰাজনীতিবিদসকলৰ মাজৰ কেইজনে টুইটাৰৰ স্বত্তাধিকাৰী তেওঁলোকৰ বিপৰীত পন্থাৰ বা ধৰি ল'লো বিপক্ষৰ হ'ল তেতিয়া টুইটাৰ ব্যৱহাৰ নকৰাকৈ থাকিব পাৰিব সেয়াও এটা বিচাৰ্যৰ বিষয় হ'ব পাৰে!!! 

খ)

ভাতবৰ্ষৰ ভিতৰত শ্ৰেষ্ঠ আৰু এসময়ত মুক্ত চিন্তা-চৰ্চাৰ বাবে চিনাকী, দেশৰ ৰাজধানীত স্থাপিত জৱাহৰলাল নেহৰু বিশ্ববিদ্যালয়ৰ ছাত্ৰ ছাত্ৰীৰ মাজত যুঁজ হয় বিশ্ববিদ্যালয়ৰ হোষ্টেলৰ খাদ্য তালিকাত কি খাদ্য থাকিব কি নাথাকিব তাকে লৈ.. কিবা হাঁহি উঠা বিষয় হ'লেও ইয়েই মোৰ দেশৰ প্ৰকৃত সত্য। কাৰণ মুক্ত চিন্তা চৰ্চাৰ পৰিৱেশটো সম্পূৰ্ণভাৱে নোহোৱা কৰি তোলা। তাৰ লগতে সংপৃক্ত হৈ আছে ৰাজনৈতিক উদ্দেশ্যে প্ৰণোদিতভাৱে দেশৰ জনসাধাৰণক নানাটা আভুৱা ভৰা কথাৰে মূল সমস্যা তথা চিন্তনীয় বিষয়বোৰৰপৰা আঁতৰাই ৰখা।

(২৬ এপ্ৰিল ২০২২/বৰপেটা)

অপ্ৰাসংগিক :অসমীয়া ভাষা বিষয়ক কিছু ব্যক্তিগত ভাৱনা

ব্ৰিটিছ কাহানিবাতে আমাৰ ইয়াৰপৰা গ'ল বুলি আমি বিষয় প্ৰসংগত সততে ক'লেও ব্ৰিটিছে অসম এৰি যোৱাৰ নিৰ্দিষ্ট ইতিহাসসন্মত তাৰিখ এটা বুৰঞ্জীত আছে আমাৰ বাবে।

কিন্তু 'আংকল' আৰু 'আন্টি' ৰ আগমন অসম মুলুকলৈ কেতিয়া হ'ল আৰু অসমৰ সামাজিক জীৱনত ইয়াৰ প্ৰয়োগ আৰু ফলাফলৰ বিষয়ে গৱেষণাৰ এটা হ' ব পাৰে নিশ্চয়!! 

একেবাৰে সাধাৰণ দৃষ্টিত সততে দৃষ্টিগোচৰ হোৱা এটা কাৰক হ'ল - এই #আংকল আৰু #আন্টিৰ আগমনে অসমৰ নগৰাঞ্চলক বাদ দিলেও গ্ৰামাঞ্চলতো ক্ৰমান্বয়ে "বৰদেউতা-বৰমা, মামা-মামী, পেহা-পেহী, খুড়া-খুড়ী, মহা-মাহী" ৰ দৰে আমাৰ আপোন আৰু একমাত্ৰ অসমীয়া ভাষাৰ একচেতীয়া অধিকাৰ থকা শব্দবোৰৰ গুৰুত্ব নতুন প্ৰজন্ম (নবৈ দশকত জন্মলাভ কৰা সকলক ধৰিব পাৰি)ৰ গৰিষ্ঠসংখ্যকৰ বাবে গুৰুত্বহীন কৰি পেলাইছে।

আজি যদি আপুনি বা মই "আমৈ আৰু তাৱৈ" শব্দ দুটাৰ ব্যৱহাৰ কৰোঁ, তেন্তে ৮০ শতাংশ নতুন প্ৰজন্মৰ বাবে যে,  

#তাৱৈ আৰু #আমৈ 

প্ৰকৃততে ভাতৰ লগত খোৱা বস্তু নে পিন্ধা বস্তু তাক লৈ প্ৰশ্ন উঠিব!! সেয়া নোকোৱাই ভাল হ'ব নিশ্চয়!!

ইমানৰ পিছতো মোৰ  #মাতৃভাষাটো হেৰাই যাব বুলি ভয় নালাগে। কাৰণ মাতৃৰ মুখৰপৰা শিকা অসমীয়া ভাষাটোক অন্তঃকৰণেৰে ভালপোৱা মানুহখিনিয়ে সদায় প্ৰয়োজনীয় সংশোধন আৰু সংবৰ্ধনেৰে ভাষাটোৰ প্ৰাসংগিকতা আৰু ঐতিহ্য বিশ্ববাসীৰ সন্মুখলৈ নিয়াৰ প্ৰচেষ্টা অব্যাহত ৰাখিছে।

দুখ লাগে এইবাবেই যে নতুন প্ৰজন্মক আপোন মাতৃভাষাটোৰ শুদ্ধকৈ শিক্ষা দিয়াত আমি কিয় বিফল হৈছো নিজৰ ৰাজ্যতে, সেই বিষয়ে সময়োপযোগী আলোচনা কৰি সময়োচিত পদক্ষেপ ল'বলৈ আমাৰ হাতত যে সময়ৰ বৰ অভাৱ।

আনহাতে চৰকাৰ আৰু প্ৰশাসনৰো কৰণীয়খিনি ৰাজনৈতিক লাভ-লোকচানতে আৱদ্ধ হৈ থকাত ভাষাৰ বিলৈ নহৈ পাৰেনে আৰু অসমত মুলুকত!!

(৭ ফেব্ৰুৱাৰী ২০২২/নৈশবাছ যাত্ৰাৰ সময়ত)