৩৩. উপভাষীয়ভাৱে অসমীয়াক পূব অসমীয়া আৰু পশ্চিম অসমীয়া এই দুভাগত ভগাব পাৰি। আটাইতকৈ পূব সীমান্তৰ শদিয়াৰ পৰা গুৱাহাটীলৈকে ভাষাটোৱে কিছু পৰিমাণৰ একৰূপতা দেখুৱায় আৰু আহোম ৰজাসকলৰ ৰাজধানী শিৱসাগৰৰ কথিত উপভাষাৰ পৰা কাচিৎহে চকুত পৰা পাৰ্থক্য দাঙি ধৰে। আৰু সাহিত্যিক উদ্দেশ্যৰে সাধাৰণতে এই উপভাষাটোকে মান্য ভাষা বুলি মনা হয়।
৩৪. পশ্চিমৰ জিলা কামৰূপ আৰু গোৱালপাৰা এই দুখনত ইটোৰ পৰা সিটোৰ মাজত আৰু এইবোৰৰে সৈতে পূব অসমৰ মান্য কথ্যৰ মাজত তীব্ৰ পাৰ্থক্য থকা কেইবাটাও স্থানীয় উপভাষা আছে। গোৱালপাৰা জিলাৰ কথ্য উপভাষাটো - তেওলোকৰ বংশধৰসকলে গোৱালপাৰা আৰু কামৰূপৰ লগালগি এলেকাবোৰত শাসন কৰা কোচবিহাৰৰ ৰজাসকলৰ শাসন কালত বিকশিত হোৱা - ৰাজবংশী উপভাষাৰ সংমিশ্ৰণত অতিকৈ কলুষিত হোৱা যেন লাগে। পূবৰ শিৱসাগৰ জিলাৰ মান্য কথ্য আৰু পশ্চিমৰ গোৱালপাৰাত মিশ্ৰিত উপভাষাৰ মাজত কামৰূপৰ উপভাষাটো প্ৰচলিত হৈ আছে।
৩৫. কামপৰূপ জিলা এখন একৰূপী উপভাষীয় অঞ্চল নহয়। ইয়াৰ বিভিন্ন অঞ্চলত বিভিন্ন উপভাষা আছে।...কামৰূপৰ উপভাষাৰ মাজৰ পাৰ্থক্য বিন্দুবোৰ ঘাইকৈ ধ্বনিতাত্ত্বিক বিস্তৃতিৰ ভিতৰতে সীমিত, ৰূপতত্ত্ব আৰু শব্দসম্ভাৰৰ ক্ষেত্ৰলৈ কেতিয়াবাহে বিয়পিছে। আমহাতে, পূব আৰু পশ্চিম অসমীয়াৰ পাৰ্থক্যবোৰ ব্যাপক, আৰু ধ্বনিতত্ত্ব, ৰূপতত্ত্ব আৰু বিৰলভাৱে শব্দসম্ভাৰ, এই সকলো ক্ষেত্ৰলৈ ব্যাপ্ত হৈছে।
*পৃষ্ঠা - ১৩
**অসমীয়া ভাষাৰ গঠন আৰু বিকাশ - ড০ বাণীকান্ত কাকতি (অসমীয়া অনুবাদ - বিশ্বেশ্বৰ হাজৰিকা),
বীণা লাইব্ৰেৰী, গুৱাহাটী, প্ৰথম পুনৰ মুদ্ৰন - ছেপ্টেম্বৰ ২০০২.
No comments:
Post a Comment