**মধ্য-প্ৰাচ্যৰ যুদ্ধ বিভীষিকা**

 ইৰাণ-আমেৰিকা-ইজৰাইল মধ্য-প্ৰাচ্যৰ যুদ্ধ বিভীষিকা ইত্যাদি...

 

যোৱা ২৮ ফেব্ৰুৱাৰী ২০২৬ তাৰিখে আমেৰিকা আৰু ইজৰাইলৰ সন্মিলিত আক্ৰমণৰ সন্মুখীন হোৱা আৰু প্ৰত্যুত্তৰ হিচাপে ইৰাণেই ইজৰাইলত আক্ৰমণ কৰাৰ আজি দহ দিনৰ পাছত সমগ্ৰ ইৰাণতে এক বিভীষিকাময় পৰিৱেশ বিৰাজ কৰিছে।

এই বিভীষিকাই ক্ৰমে ছানি ধৰিবলৈ আৰম্ভ কৰিছে সমগ্ৰ মধ্য-প্ৰাচ্যক!! কাৰণ ইৰাণে নিজ দেশত হোৱা আক্ৰমণৰ প্ৰত্যুত্তৰ হিচাপে আমেৰিকাৰ সৈনিক চাউনী তথা যু্দ্ধাস্ত্ৰ থকা নিজৰ চুবুৰীয়া ৰাষ্ট্ৰসমূহক নিজৰ আধুনিক ক্ষেপনাস্ত্ৰৰে আঘাত হানিবলৈ আৰম্ভ কৰাত সমগ্ৰ মধ্য-প্ৰাচ্যত এক সংগোপন সংশয়ে গ্ৰাস কৰি আনিছে।

ইফালে বিশ্বৰ দুজন স্ব-ঘোষিত একনায়কত্ববাদী নেতাৰ নিজা অভিলাষ পূৰণৰ স্বাৰ্থত আয়োজন চলিছে নৰ হত্যাৰ!!

আনফালে নিজস্ব অস্তিত্ব ৰক্ষা উদ্দেশ্যে আৰু ঐতিহ্যবাহী অতীতৰ সোঁৱৰণত ইৰাণৰ মৰণ-পণ যুঁজ!!

ইৰাণৰ কঠোৰ ধৰ্মীয় নীতি-নিয়মৰ আপুনি বিৰোধিতা কৰিব পাৰে কিন্তু পাৰস্য সভ্যতাৰ অতীত গৌৱৰক আপুনি নসাৎ কৰিব নোৱাৰে।

কিন্তু সেই ইৰাণৰ বুকুতে আজি পনীয়া সোণৰ স্বাৰ্থত এক ৰক্তক্ষয়ী যুদ্ধৰ বিভীষিকাই ছানি ধৰিছে দেশৰ সমগ্ৰ সাধাৰণ জনতাক।

কোন দায়ী ইয়াৰ বাবে!! সেয়া আপুনি মই বিশ্লেষণ কৰি উলিওৱাতো ইমানো সহজ নহয়।

তথাপি মানৱীয় উচ্চাকাংক্ষা তথা শক্তিশালী ৰাষ্ট্ৰই দুৰ্বল ৰাষ্ট্ৰৰ সাৰ্বভৌম অধিকাৰ আৰু সম্পদ কাঢ়ি লোৱাৰ স্বাৰ্থত সমান্তৰাল প্ৰশাসন চলোৱাৰ যি এক তীব্ৰ ভোক, তাকে আমি এই সমগ্ৰ পৰিঘটনাৰ মূল কাৰক হিচাপে বাছি উলিয়াব পাৰোঁ।

পৰিঘটনাৰ বিক্ৰিয়া হিচাপে ইৰাণে হৰমুজ প্ৰণালী বন্ধ কৰি দিয়াৰ পৰৱৰ্তী ঘটনাই সমগ্ৰ বিশ্বকে অস্বস্তিত পেলাইছে লাহেকৈ। হৰমুজ প্ৰণালী বন্ধ হোৱাৰ ফলত বিশ্বৰ তৈল বজাৰ আৰু অন্যান্য সামগ্ৰী পৰিৱহণ কৰা জাহাজসমূহ আৱদ্ধ হৈ পৰাত বিশ্বৰ অৰ্থনীতিত ইতিমধ্যে ইয়াৰ বিৰূপ প্ৰভাৱ পৰিবলৈ আৰম্ভ কৰিছে। উদাহৰণস্বৰূপে ভাৰত মুলুকত ৰন্ধন গেছ চিলিণ্ডাৰৰ মূল্য বৃদ্ধি হোৱা, বাণিজ্যিক ৰন্ধন গেছৰ চিলিণ্ডাৰৰ নাটনি আৰম্ভ হোৱা, ঘৰুৱা ৰন্ধন গেছৰ চিলিণ্ডাৰৰ অনলাইন বুকিং নোহোৱা, চিলিণ্ডাৰ ল'বলৈ গেছ এজেন্সীৰ সন্মুখত ভাৰতবৰ্ষত সাধাৰণ জনতাৰ দীঘলীয় লাইন আদি দৃষ্টিগোচৰ হোৱাৰ সমান্তৰালভাৱে টকাৰ মূল্য ডলাৰৰ তুলনাত সৰ্বনিম্ন স্তৰলৈ গতি কৰিছে। ইয়াৰোপৰি খাৰুৱা তেলৰ মূল্য প্ৰতি বেৰলত বহুখিনি উৰ্ধগামী হোৱাত বিশ্বৰ বহু দেশত পেট্ৰ'ল, ডিজেলকে আদি কৰি ইন্ধনজাত সামগ্ৰীৰ মূল্যৰ অস্বাভাৱিক হাৰত বৃদ্ধি হোৱা যুদ্ধৰ আৰম্ভ হোৱাৰ পৰৱৰ্তী যোৱা ১২ দিনত স্পষ্টকৈ পৰিদৃশ্যমান হৈ উঠিছে।

যুদ্ধৰ ভয়াবহতা বৃদ্ধি পোৱা আৰু ইয়াৰ সময় সীমা যিমানেই বাঢ়ি যাব সিমানেই ক্ৰমে ক্ৰমে সমগ্ৰ বিশ্বতে পৰিদৃশ্যমান হ'বলগীয়া সাম্ভাৱ্য বহুতো সমস্যাৰ বিষয়ে সম্প্ৰতি সকলোতে আলোচনা চলিছে। বিশেষজ্ঞসকলেও নিজা নিজা ধৰণেৰে বিচাৰ-বিশ্লেষণ কৰি মতামত আগবঢ়াইছে। বিশ্বৰ বহুকেইখন দেশে জনসাধাৰণৰ বাবে বিভিন্ন সামগ্ৰী ক্ৰয়ৰ সীমা নিৰ্ধাৰণ কৰি দিবলগীয়া পৰিস্থিতিৰো উদ্ভৱ হৈছে ইতিমধ্যে।

সৰ্বোপৰি যুদ্ধৰ পৰৱৰ্তী সময়ত সমগ্ৰ বিশ্বৰে শ্বেয়াৰ বজাৰত পতন আৰম্ভ হৈছে। বিশেষকৈ ভাৰতবৰ্ষৰ শ্বেয়াৰ বজাৰত কেইটামান দিনৰ ভিতৰতে বহু লাখ কোটি টকা নিৱেশকসকলে হেৰুৱাব লগীয়া হৈছে। একেই পৰিস্থিত প্ৰায় সমগ্ৰ বিশ্বতে দৃষ্টিগোচৰ হৈছে। ইয়াকে লৈ সমগ্ৰ বিশ্বৰে অৰ্থনীতিবিদসকলো চিন্তাত পৰিছে। কোনো কোনো দেশে দুদিনমান নিজৰ জনতাক প্ৰবোধ দিবলৈ বিভিন্ন ধৰণৰ সংবাদ বাৰ্তা প্ৰেৰণ কৰিছিল যদিও সকলো ক্ৰমে ফোটোকাৰ ফেনত পৰিণত হৈছে বৰ্তমান।

 

(১১ মাৰ্চ, ২০২৬)

***************

পোহৰৰ উৎসৱ, জুবিনদাৰ মৃত্যু, ৰেলযাত্ৰাৰ অনুভৱ ইত্যাদি+

পোহৰৰ উৎসৱ, জুবিনদাৰ মৃত্যু, ৰেলযাত্ৰাৰ অনুভৱ ইত্যাদি+

ক) 

নামনিমুৱা ৰেলত কৰ্মস্থলীলৈ ৰাওনা হৈছো আজি পোহৰৰ উৎসৱ দীপাৱলীৰ দিনটোত। আগৰ বছৰবোৰৰ দৰে এই বছৰৰো মাটিৰ চাকিৰে পোহৰৰ উৎসৱৰ আয়োজন ঘৰত। আতচবাজীৰ শব্দ মই ব্যক্তিগতভাৱে আগৰে পৰা ভাল নাপাওঁ। আতচবাজী বুলিলেই শব্দ প্ৰদূষণ আৰু বায়ু প্ৰদূষণে ক'ব নোৱাৰাকৈয়ে মোৰ মনত জুমুৰি দি ধৰেহি। যদিওবা 'এপাচি শাকত এটা জলকীয়া'ৰ দৰে ইয়াৰ ফলাফল শূণ্যৰ ঘৰত, তথাপিওচোন মনটোৱে এই সময়খিনিত বাৰে বাৰে সকিয়াই দিয়ে মোৰ পাৰিপাৰ্শ্বিকতাত সমিল মিলেৰে বাস কৰা জীৱ-জন্তু আৰু বাৰীত থকা চৰাই-চিৰিকটিবোৰৰ অসুবিধাখিনি.. 

ল'ৰা-ছোৱালী দুটা সৰু হৈ থকা বুলি যোৱা দুবছৰমান অলপ অচৰ চাকি-বন্তিৰ লগতে জিলমিল পোহৰ দিয়া লাইটবোৰ ঘৰৰ বাৰান্দাত লগোৱাৰ ব্যৱস্থা কৰিছোঁ। ইয়াৰ উপৰিও বিকট শব্দ কৰা ফটকাৰ সলনি পোহৰ দিয়া সামগ্ৰী দুই এবিধ জ্বলাই সিহঁতক অলপমান ফূৰ্তি কৰিবলৈ দিছিলোঁ। সেয়েহে এইবাৰো ডাঙৰ ল'ৰাটোৱে তেনে সামগ্ৰী আনি দিয়াৰ বাবে মোক অনুৰোধ কৰিছিল। কিন্তু তাক জুবিনদাৰ মৃত্যুৰ বাবে এইবাৰ জ্বলাব নালাগে বুলি কোৱাত একেষাৰতে সি মানি ল'লে। কিবা এটা লাগে বুলিলে কেতিয়াবা বৰকৈ আব্দাৰ কৰা শিশু মন এটাইও কিয় হঠাতে এনেকৈ মানি ললে সেয়া মোৰ বোধগম্যতাৰ বাহিৰত!! হয়তো জুবিন গাৰ্গৰ আত্মীয়তা আমাৰ বাবে সেইখিনিতে।

খ)

কৰ্মস্থলীলৈ অহাৰ উদ্দেশ্যে কানুগাঁৱৰ ঘৰৰপৰা ৰাতিৰ ৰেলত উঠিবলৈ গোলাঘাট ৰেলষ্টেচনলৈ অহা ১২ কিলোমিটাৰৰ সমগ্ৰ পথছোৱাত  মাটিৰ চাকি আৰু জিলমিল পোহৰ বিলোৱা ৰঙ-বিৰঙী লাইটবোৰৰ বাহিৰে ফটকা-আতচবাজীৰ শব্দ কেৱল দুটা-তিনিটা মানহে শুনিবলৈ পালোঁ। আনকি গোলাঘাট চহৰতো আতচবাজীৰ শব্দ সন্ধিয়া ৭ বজালৈকে প্ৰায় শূণ্যৰ ঘৰত। পিছে ৰেলষ্টেচনৰ কাষৰীয়া ঠাইখিনিত শব্দৰ আধিক্য কিছু শুনিবলৈ পালোঁ। ৰৈ ৰৈ মাজে মাজে হ'লেও দুই এটা সৰু ফটকা আৰু কাণ তাল মাৰি ধৰা  ফটকাৰ শব্দও কাণত পৰিল। লাহে লাহে ৰেলখন গন্তব্যস্থল অভিমুখে অগ্ৰসৰ হোৱাৰ লগে লগে দৃষ্টিগোচৰ হৈছে যে ৰেলপথৰ কাষৰীয়া ঠাইবোৰত চাকি আৰু লাইটবোৰ ঠিকেই জ্বলিছে। কিন্তু আতচবাজীৰ শব্দ ক'ৰবাত এটা বা দুটা মাজে মাজেহে শুনিবলৈ পাইছোঁ। পিছে কিয় ক'ব নোৱাৰো এতিয়ালৈকে পাৰ হৈ অহা সৰু বৰ ৰেল ষ্টেছনত কিন্তু আতচবাজীৰ পয়োভৰ তুলনামূলকভাৱে কিছু বেছি। কিয় সেয়া মই ক'ব নোৱাৰিম! কিন্তু ৰেলত যাত্ৰা কৰা আন যাত্ৰীসকলেও মন কৰিলে কথাটো ধৰিব পাৰিব।

গ)

পোহৰৰ উৎসৱৰ নামত চাকি আৰু ৰঙীন লাইট জ্বলোৱাৰ মই সমৰ্থক। কিন্তু আতচবাজীৰ নামত এদিনতে অতিমাত্ৰা শব্দ আৰু বায়ু প্ৰদূষণেৰে প্ৰকৃতি বিনষ্ট কৰাত আমিবোৰেই আগভাগ লোৱা বিষয়টোৰ মই বিৰোধী। সেয়েহে বৰ্তমান সময়ছোৱাত জুবিন গাৰ্গৰ মৃত্যুৰ পাছতো মোৰ স্থিতি সেই আগৰ দৰে একেই আছে।

অসমীয়াৰ হিয়াৰ আমঠু জুবিন গাৰ্গৰ আকস্মিক মৃত্যুৰ ১ মাহ পূৰণ হোৱাৰ পৰৱৰ্তী দিনটোত এইবাৰ পোহৰৰ উৎসৱ দীপাৱলীৰ আয়োজন। আমি তেখেতৰ গুণমুগ্ধ হিচাপেই নহয় তেখেত জন্মভূমিৰ বাসিন্দা হিচাপেও এইবাৰৰ পোহৰৰ উৎসৱতে আতচবাজীৰ দৰে প্ৰকৃতিৰ বাবে হানিকাৰক পৰম্পৰাটো সম্পূৰ্ণ বন্ধ কৰি আন এক নজিৰ সৃষ্টি কৰিব পাৰিলোঁহেঁতেন!! পিছে সময় আৰু পৰিস্থিতিয়ে দিয়া এই সুবিধাখিনি গ্ৰহণ কৰাৰ পৰা আমি বিৰত থাকিলোঁ।

কাৰণ আমি নিজক কিয় সলনি কৰিম প্ৰকৃতিৰ ভালৰ বাবে!!! আমাৰ ব্যক্তিগত সুখ-আনন্দখিনি জলাঞ্জলি দি প্ৰকৃতি তথা আমাৰ উত্তৰ পুৰুষৰ ভৱিষ্যত সুৰক্ষিত কৰাতো যুক্তিপূৰ্ণ কেনেকৈ হ'ব পাৰে!!!

                          *********

(২০ অক্টোবৰ ২০২৫/ফৰকাটিঙৰ পৰা সৰভোগলৈ #আলিপুৰ_দুৱাৰ_ইন্টাৰচিটি ৰেলত কৰা যাত্ৰা কালত)

ৰাষ্ট্ৰীয় হস্ততাঁত দিৱসৰ ভাৱনা

ৰাষ্ট্ৰীয় হস্ততাঁত দিৱসৰ ভাৱনা

পুৱাই ৰেডিঅ'ত আকাশবাণী ডিব্ৰুগড় কেন্দ্ৰৰ ৭ বাজি ১৫ মিনিটৰ আজিৰ দিনটো শীৰ্ষক অনুষ্ঠানত শুনিলোঁ যে আজি ৰাষ্ট্ৰীয় হস্ততাঁত দিৱস। দিৱসৰ স্বাভাৱিকতা অনুযায়ী ৰাজ্য প্ৰশাসনে আয়োজন কৰা অনুষ্ঠানৰ বিষয়েও জানিব পাৰিলোঁ।

ৰেডিঅ'ত কথাতো শুনি থাকোতে গান্ধীজীয়ে দূৰ অতীতে অসম ভ্ৰমণ কালত কোৱা "অসমীয়া শিপিনীয়ে তাঁতশালত সপোন ৰচে" বোলা উক্তিটোলৈ মনত পৰিছিল। গান্ধীজীৰ উক্তিৰ সত্যতা প্ৰমাণৰ বাবে আমি অতীতলৈ ঘূৰি যোৱাৰ সলনি বৰ্তমান সময়তো অসমৰ শিপিনীৰ পাৰদৰ্শিতা তথা সৃষ্টিশীলতাক কাষৰ পৰা দেখি আছো। বিশেষকৈ বৰ্তমান সময়ত অসমীয়া চাদৰ-মেখেলাৰ নতুন নতুন আৰ্হিৰ সমান্তৰালভাৱে অসমৰে বিভিন্ন জনজাতীয় সাজ-পাৰৰ ব্যাপক চাহিদা ৰাজ্যখনৰ লগতে দেশৰ ভিন ভিন প্ৰান্ততো বৃদ্ধি পোৱা আমি বিভিন্ন উৎসৰ খবৰবোৰৰ পৰা গম পাওঁ। একেদৰে অসমৰ পাট-মুগা কাপোৰৰ চাহিদা আৰু আকৰ্ষণও কেতিয়াবাই দেশৰ সীমা অতিক্ৰমি আন্তঃৰাষ্ট্ৰীয় পৰ্যায় পাইছেগৈ। বৰ্তমান বিভিন্ন ৰাষ্ট্ৰীয়-আন্তঃৰাষ্ট্ৰীয় ফেছন প্ৰতিযোগিতা আৰু প্ৰদৰ্শনীসমূহতো অসমীয়া পাট-মুগাৰ সাজ-পাৰ আৰু জনজাতীয়া সাজ পৰিধান কৰা দেশ-বিদেশৰ চেলিব্ৰিটী তাৰকাক আমি সততে দেখা পাওঁ।

এই বিশেষ দিৱসটোৰ প্ৰাসংগিকতা বুজিয়েই যেন মনটোৱে সংগোপনে মোক কৈ গ'ল বৰ্তমান অসমীয়া থলুৱা শিপিনীসকলৰ অৱস্থাটোৰ বিষয়ে। স্বাভাৱিকভাৱেই মনলৈ আহিছে অসমীয়া বিভিন্ন সাজ-পাৰৰ ক্ৰমবৰ্দ্ধমান চাহিদা আৰু সমাদৰ অনুপাতে গ্ৰামাঞ্চলৰ থলুৱা শিপিনীসকলে ইয়াৰ পৰা কিমান দূৰ আৰ্থিকভাৱে লাভান্বিত হৈছে!! শিপিনীসকলৰ প্ৰকৃতাৰ্থতে লাভান্বিত কৰিব পৰাকৈ চৰকাৰ আৰু হস্ততাঁতৰ সৈতে জড়িত চৰকাৰী বিভাগটোৱে কিবা ব্যৱস্থা লৈছেনে বাৰু!!

থলুৱা শিপিনীৰ আৰ্থিক অৱস্থা তথা সামগ্ৰিকভাৱে ৰাজ্যৰ হস্ততাঁত খণ্ডৰ চৰম হতাশজনক পৰিস্থিতিক একাষৰীয়াকৈ থৈও আজিৰ ৰাষ্ট্ৰীয় হস্ততাঁত দিৱৰ প্ৰাক্ ক্ষণতে আকৌ এবাৰ মনলৈ আহিছে প্ৰায়ে মনত লৈ ফুৰা তলৰ প্ৰশ্নকেইটা -

Ø কিয় দুটামান টকা বেছি হোৱা বাবেই আমি অসমৰ থলুৱা শিপিনীয়ে শালত বোৱা গামোচাখনৰ সলনি বহিঃৰাজ্যৰ পৰা অহা গামোচা নামৰ কাপোৰবিধকে এতিয়াও ৰাজ্যৰ সভা-সমিতিত ব্যাপকভাৱে ব্যৱহাৰ কৰি আছো!!

Ø আকৌ উৎসৱৰ সময়ত থলুৱা গামোচাৰ বিক্ৰী বৃদ্ধি কৰাৰ উদ্দেশ্যে বহিঃৰাজ্যৰ পৰা অহা গামোচা বিচাৰি উলিওৱাৰ নামত ৰাজ্যৰ দুখনমান চহৰৰ দোকান কেইখনমানলৈ গৈ কেমেৰা আৰু সাংবাদিক লগত লৈ গৈ বাতৰি কাকতৰ সংবাদ শীৰ্ষ হোৱাৰ বাহিৰে প্ৰশাসনৰ ফালৰ পৰা সম্যাটোৰ পূৰ্ণ সমাধানৰ বাবে বিশেষ সদিচ্ছা থকা যেন নালাগে!!

Ø আনহাতে বাকী সাজ-পাৰক নিলগাই থৈও জিআই টেগ থকা ৰাজ্যখনৰ স্বকীয়তাৰ পৰিচয় বহনকাৰী বিশেষ সামগ্ৰী গামোচাখনৰে স্বকীয়তা কিয় আমি বৰ্তমান অটুট ৰাখিব পৰা নাই??

সেয়েহে নিজকে নিজে প্ৰশ্ন কৰিছো যে এনে এক পৰিস্থিতিত অসম নামৰ ৰাজ্যখনত ৰাষ্ট্ৰীয় হস্ততাঁত দিৱস উদযাপনৰ প্ৰাসংগিকতা কিমানদূৰ যুক্তিসংগত!!

 

(৭ জুলাই, ২০২৫/সৰভোগ)

 

*****************

অসমৰ কলেজ শিক্ষক নিৰ্বাচনৰ সাম্প্ৰতিক বিতৰ্ক আৰু ব্যক্তিগত কথকতা

 

অসমৰ কলেজ শিক্ষকৰ নিৰ্বাচন আৰু কিছু ব্যক্তিগত কথকতা

 

স্নাতকোত্তৰ ডিগ্ৰী লাভ কৰাৰ পৰৱৰ্তী বৰ্ষত গৱেষণাত নামভৰ্তি কৰিয়েই মহাবিদ্যালয়ৰ সহকাৰী অধ্যাপক পদৰ বাবে জীৱনৰ ২য় সাক্ষাৎকাৰটোৱেই দিছিলোঁ অসমৰ অন্যতম এখন পুৰণি আৰু ঐতিহ্যপূৰ্ণ মহাবিদ্যালয় বি বৰুৱা মহাবিদ্যালয় বা ভোলানাথ বৰুৱা মহাবিদ্যালয়ত ২০১০ চনত। সেই সময়ত চাকৰি পাম বুলি দিয়াৰ সলনি অভিজ্ঞতা আহৰণৰ বাবেহে সাক্ষাৎকাৰত বহিছিলোঁগৈ। সাক্ষাৎকাৰৰ অভিজ্ঞতা অৱশ্যেই স্মৰণীয় আছিল। এই সাক্ষাৎকাৰটো মোৰ বাবে স্মৰণীয় আছিল এই কাৰণেই যে, স্কুলীয়া জীৱন পঢ়া আমাৰ সময়ৰ আটাইতকৈ প্ৰিয় English for Schools শীৰ্ষক ইংৰাজী ব্যাকৰণখনৰ স্ৰষ্টা টাবু টাইড ছাৰক সেই সাক্ষাৎকাৰতে প্ৰথম আৰু শেষ বাৰৰ বাবে মুখামুখিকৈ লগ পোৱাৰ সৌভাগ্য হৈছিল।

পুৰণি এই সাক্ষাৎকাৰটোৰ প্ৰসংগ হঠাতে মনলৈ অহাৰ কাৰণটো হ'ল বৰ্তমান অসমৰ সামাজিক মাধ্যম, বাতৰি-কাকত নতুবা বৈদ্যুতিন-মাধ্যম সকলোৱে বি বৰুৱা মহাবিদ্যালয়ৰ যিগৰাকী সহযোগী অধ্যাপিকা গীতাশ্ৰী তামূলীৰ চাকৰিৰ নিৰ্বাচন প্ৰক্ৰিয়া আৰু সাক্ষাৎকাৰক লৈ মুখৰ হৈ পৰিছে সেই চাকৰিটোৰ নিৰ্বাচন প্ৰক্ৰিয়া তথা সাক্ষাৎকাৰটোৱেই আছিল মোৰ বাবে স্মৰণীয় সাক্ষাৎকাৰটো। এই সাক্ষাৎকাৰতে নিৰ্বাচিত হৈ গীতাশ্ৰী তামুলীয়ে বি বৰুৱা মহাবিদ্যালয়ত সহকাৰী অধ্যাপক হিচাপে যোগদান কৰিছিল। গীতাশ্ৰী বাইদেউৰ সৈতে ব্যক্তিগত চিনা পৰিচয় নাছিল যদিও তেখেতৰ লিখনিৰ সৈতে পৰিচয় হৈছিলোঁ তাৰ আগতেই। সেইবাবে তেখেতে চাকৰিটো পোৱা বুলি পাছত জানিব পাৰিছিলোঁ। উল্লেখযোগ্য যে, সেই সময়ৰ অসমৰ অন্য মহাবিদ্যালয়সমূহত অনুষ্ঠিত সাক্ষাৎকাৰবোৰৰ গৰিষ্ঠসংখ্যকতে হোৱাৰ দৰে এই সাক্ষাৎকাৰটোতো কিবা স্বজন-তোষণ বা দুৰ্নীতি হোৱা বুলি কিন্তু আমি শুনিবলৈ পোৱা নাছিলোঁ তেতিয়া। কাৰণ সেই সময়ত সাক্ষাৎকাৰ এটা অনুষ্ঠিত হোৱাৰ আগতেই চাকৰিটো কাৰোবাৰ বাবে আগতেই নিৰ্দিষ্ট কৰি থোৱা বা সাক্ষাৎকাৰ উপস্থিত বিশেষজ্ঞক দেখি কোনে চাকৰি পাব পৰ্যন্ত আলোচনা হৈছিল সাক্ষাৎকাৰ অনু্ষ্ঠিত হোৱাৰ দিনাই। আমিবোৰ সেই সময়ত একেবাৰে নতুন আছিলোঁ বাবে প্ৰথম অৱস্থাত সকলো দেখি শুনিও বহু সময়ত আশাবাদী মন এটা লৈ ইটোৰ পাছত সিটো সাক্ষাৎকাৰলৈ দৌৰি ফুৰিছিলোঁ।

প্ৰসংগক্ৰমে মনত পৰিছে আজিৰ পৰা ১৫ বছৰৰ আগৰ সেই সময়ৰ মহাবিদ্যালয়ৰ সহকাৰী অধ্যাপক পদৰ সাক্ষাৎকাৰবোৰত হোৱা বিভিন্ন প্ৰকাৰৰ স্বজন-তোষণৰ বিষয়বোৰলৈ। সহকাৰী অধ্যাপকৰ সাক্ষাৎকাৰত বহাৰ বাবে প্ৰয়োজনীয় যোগ্যতাক বাদ দিলে লগত প্ৰয়োজনীয় অতিৰিক্ত তথ্যখিনি এতিয়াৰ সময়ৰ সাক্ষাৎকাৰতকৈ সেই সময়ত কিছু বেলেগ আছিল আৰু প্ৰাৰ্থী বাছনিৰ বাবে ঠিক কৰা নম্বৰৰ বিভাজনটোও এতিয়াতকৈ পৃথক আছিল। ইয়াৰোপৰি বিশেষকৈ সেই সময়ত মৌখিক সাক্ষাৎকাৰত থকা বেছি নম্বৰেও বাছনি কমিটিক ইচ্ছা অনুযায়ী স্বজন-তোষণৰ অতিৰিক্ত সুবিধা কৰি দিছিল। যাৰ ফলত প্ৰায়ে মহাবিদ্যালয়সমূহত আগৰে পৰা অস্থায়ীভাৱে কৰি থকা ব্যক্তিজনক নতুবা সাক্ষাৎকাৰৰ বাছনি কমিটিৰ সৈতে চিনা-পৰিচয় থকাসকল নিৰ্বাচিত হোৱা দেখা গৈছিল।

সেই সময়ত বিভিন্ন সাক্ষাৎকাৰত বহিবলৈ যোৱা চিনাকী-অচিনাকী প্ৰাৰ্থীসকলৰ মুখৰ পৰা অসমৰ প্ৰায় প্ৰতিটো প্ৰান্তৰৰ মহাবিদ্যালয়সমূহত সাক্ষাৎকাৰৰ নামত কেনেকুৱা কৰ্ম-কাণ্ডৰ ঘটে, সেই বিষয়ে বহু কথাই জানিবলৈ সক্ষম হৈছিলোঁ। এসময়ত ব্যক্তিগতভাৱে মোৰ মনত এনেকুৱাও ভাব হৈছিলগৈ যে কোনোবা এখন মহাবিদ্যালয়ৰ সহকাৰী অধ্যাপক পদৰ সাক্ষাৎকাৰৰ বাবে মতা পত্ৰখন পোৱাৰ পাছতে যেতিয়া জানিবলৈ পাইছিলোঁ যে তাত অমুকে আগৰে পৰা কাম কৰি আছে, গতিকে মিছাতে অহা যোৱাৰ টকাকেইটা খৰছ কৰিবলৈ গৈ কি হ'ব!! সেইবোৰ সময়তে কিন্তু এচামে মহাবিদ্যালয়ৰ অধ্যক্ষ, পৰিচালনা সমিতিৰ সভাপতি, স্থানীয় বিধায়ক নতুবা সাক্ষাৎকাৰৰ বাছনি সমিতিৰ সৈতে থকা আত্মীয়তা তথা চিনাকীৰ জৰিয়তে খটুৱোৱা কৰ্তৃত্বৰে চাকৰি লবলৈ সক্ষম হৈছিল। এনেবোৰ সময়ত এনেকুৱা বহু প্ৰাৰ্থীয়ে ভুৱা অভিজ্ঞতাৰ প্ৰমাণ-পত্ৰ, মহাবিদ্যালয়-বিশ্ববিদ্যালয়ৰ আলোচনীত প্ৰকাশিত লেখাৰেও সহকাৰী অধ্যাপকৰ চাকৰিত নিৰ্বাচিত হ'বলৈ সক্ষম হৈছিল। আনকি আমাৰ বহুতৰে চিনা-জনা নিজে প্ৰকৃতে সেই শ্ৰেণীৰ নোহোৱাৰ পাছতো ভুৱা জাতিগত প্ৰমাণ-পত্ৰেৰেও অন্যান্য পিছপৰা জাতি আৰু অনুসূচিত জাতিৰ বাবে সংৰক্ষিত পদত সহকাৰী অধ্যাপক হিচাপে মকৰল হৈ থকা বহু ব্যক্তি এইখন অসম মুলুকতে আছে।

বৰ্তমান গীতাশ্ৰী তামুলী বাইদেউ কেন্দ্ৰিক বিতৰ্কৰ অচিলাৰে যদি বৰ বেছি নালাগে আজিৰ পৰা ১৫ বছৰৰ আগতে অসমৰ বিভিন্ন মহাবিদ্যালয়ত নিযুক্তি পোৱা সহকাৰী অধ্যাপকসকলৰ যোগ্যতা আৰু নিযুক্তি প্ৰক্ৰিয়াৰ এক নিৰপেক্ষ আৰু উচিত তদন্ত হ'লহেঁতেন তেন্তে বহু জোলোঙাৰ আঁৰৰ মেকুৰী ওলাই পৰিল হয়। পিছে অসমীয়াত থকা প্ৰবচন ফাঁকিৰ দৰেই বৰ্তমান তদন্ত কৰা মানেই উদক ভেঁটা ৰখীয়া পতাৰ দৰে নহ'বনে?? কাৰণ যিসকলে এই বিষয়টোৰ তদন্ত কৰিব তেওঁলোকো কিবা কাৰণত যদি পাল বাহিনীৰ কৃপাত ৰাজ্য চৰকাৰৰ উচ্চপদস্থ বিষয়া হিচাপে নিযুক্ত হৈছে, তেন্তে সেই তদন্ত কেনে হ’ব সেয়া কল্পনা কৰাৰ সম্পূৰ্ণ দায়িত্ব আপোনাৰ!!

 

(২২ ফেব্ৰুৱাৰী ২০২৫ – গোলাঘাট)

************

অসম সাহিত্য সভা, বাৰ্ষিক অধিৱেশন, অৰ্থৰ অপচয় আদি কিছু বিক্ষিপ্ত ভাৱনা

 

অসম সাহিত্য সভাৰ অধিৱেশন আৰু কিছু বিক্ষিপ্ত ভাৱনা

অসমীয়া ভাষা-সংস্কৃতিৰ প্ৰসাৰ আৰু প্ৰচাৰৰ উদ্দেশ্য ১৯১৭ চনতে গঠন হোৱা অসম সাহিত্য সভাৰ যোৱা কিছু বছৰৰ কাৰ্য-কলাপে অসমৰ সাধাৰণ জনতাৰ চকু কপালত উঠাইছে। সভাৰ প্ৰতি সাধাৰণ জনতাৰ আস্থা ক্ৰমে নোহোৱা হৈ আহি সম্প্ৰতি ই বিলুপ্তিৰ গৰাহত বুলি কলেও ভুল কোৱা নহ’ব নিশ্চয়।

আগতে এবছৰৰ মূৰত অনুষ্ঠিত সভাৰ বছেৰেকীয়া অধিৱেশনখনি সম্প্ৰতি ২০০৭ বৰ্ষৰ পৰা ২ বছৰৰ বিৰতিত অনুষ্ঠিত কৰাৰ সিদ্ধান্ত লোৱা হল যদিও বছেৰেকীয়া অধিৱেশন এভাগিও অনুষ্ঠিত হৈ আহিছে বিশেষ অধিৱেশনৰ নামত। পিছে ইয়াৰ পৰা অসমীয়া সাহিত্য বা অসমৰ জনগণ কি লাভান্বিত হৈছে সেয়াহে আমাৰ দৰে সাধাৰণ নৰমনিচৰ বাবে আজিও অজ্ঞাত হৈ ৰৈছে।

বিশেষকৈ এই বছৰৰ পাঠশালা চহৰত যোৱা ৩১ জানুৱাৰীৰ ২০২৫ পৰা ৪ ফেব্ৰুৱাৰী ২০২৫ তাৰিখলৈকে সদ্য অনুষ্ঠিত হৈ যোৱা অসম সাহিত্য সভাৰ ৭৭ সংখ্যক দ্বিবাৰ্ষিক অধিৱেশনৰ বাজেট দেখিহে চকু কপালত উঠিছে। ইয়াৰ বাবে পৰম্পৰাগতভাৱেই অসমৰ বিভিন্ন চৰকাৰী তথা বেচৰকাৰী সংস্থা, ব্যক্তি আদিৰ পৰা অধিৱেশনৰ নামত দান-বৰঙণি উঠোৱাৰ উপৰি আশে-পাশে থকা শিক্ষানুষ্ঠানসমূহৰ পৰাও শকত পৰিমাণৰ দান-বৰঙণি সংগ্ৰহ কৰা বুলি জানিব পৰা গৈছে। এইখিনিতে মনত প্ৰশ্ন জাগিছে যে - এটা অনুষ্ঠানৰ বছেৰেকীয়া অধিৱেশন এখন আয়োজন কৰিবলৈ যদি চৰকাৰী শিক্ষানুষ্ঠানৰ পৰাও দান-বৰঙণি তুলিব লগা হয় তেন্তে তেনে অধিৱেশন আয়োজন নকৰিলেনো কি ক্ষতি হ’ব সমাজ বা সেই বিশেষ অনুষ্ঠানটোৰ!! আৰু যদি আয়োজন কৰিব লাগেই তেন্তে ইমান এটা বৃহৎ আৰু পুৰণি অনু্ষ্ঠানে নিজে ইয়াৰ বাবে পুঁজিৰ ব্যৱস্থা কৰিব লোৱাৰ এক পন্থা গঢ়ি তোলাতো দৰকাৰী। যিহেতু সমগ্ৰ অসমৰ প্ৰতিখন জিলাৰে প্ৰায় প্ৰতিটো প্ৰান্ততে সাহিত্য সভাৰ শাখাসমূহ আছেই। ইমানবোৰ শাখা আৰু প্ৰতিটো শাখাৰ সৈতে জড়িত অসংখ্য সদস্য থকাৰ পাছতো সভাই কিয় বেলেগৰ ওচৰত অধিৱেশন আয়োজনৰ বাবে হাত পাতিব লগা হৈছে। কিয় ৰজাঘৰৰ প্ৰত্যক্ষ পৃষ্ঠপোষকতাত সভাৰ আযোজন চলিছে এইবাৰ!!!

আন বাদ দিও যোৱাতো কাৰ্যকালত অসম সাহিত্য সভাই অসমীয়া সাহিত্যৰ সমৃদ্ধি আৰু বিকাশৰ বাবে কি বিশেষ কাৰ্যপন্থা হাতত ললে!! লগতে ভৱিষ্যতৰ বাবে সভাই কি কি পৰিকল্পনা কৰিছে সেই বিষয়ে কিবা তথ্য সাধাৰণ জনতাই হাততে পোৱাকৈ যোগান ধৰিছেনে তেওঁলোকে আজিলৈকে!! সৰ্বোপৰি যোৱাটো কাৰ্যকালত সাহিত্য সভাই কিমান ন -পুৰণি কিতাপ প্ৰকাশ কৰিলে আৰু অন্যান্য গ্ৰন্থ প্ৰকাশক উৎসাহিত কৰাৰ বাবে কি কি কাৰ্যপন্থা সভাই ললে! - সেই বিষয়ে লিখিত নথি কিবা পোৱা যাবনে!!

বিপৰীতে কোটি কোটি টকাৰ বাজেটেৰে দুবছৰৰ মূৰে মূৰে দ্বিবাৰ্ষিক অধিৱেশন পাতি মানুহৰ সমাগম ঘটোৱাই যদি সভাৰ লক্ষ্য হয় তেন্তে আমাৰ ক’বলগীয়া বিশেষ একো নাই। সমান্তৰালভাৱে সভাৰ সভাপতি সম্পাদককে প্ৰমুখ্য কৰি বিষয়ববীয়া আৰু সভা আয়োজন কৰা স্থানৰ আদৰণি সমিতিয়ে জাকত জিলিকাকৈ অধিৱেশনখনিৰ আয়োজন কৰি বাহঃ বাহঃ লোৱাৰ যি এখন পুনঃপৌণিক নাটক অসমত আৰম্ভ হৈছে, তাৰ পৰা অসমীয়া ভাষা-সাহিত্যৰ কিবা উপকাৰ হৈছে বুলি মোৰ মনে নধৰে।

ইয়াৰোপৰি দুটা বছৰৰ কাৰ্যকালত সভাপতি-সম্পাদকৰ বিভিন্ন শিতানৰ খৰছবোৰ দেখিলেতো সাধাৰণ জনতাৰ চকু কপালত উঠিব। হয়তো এনে এক উদ্দেশ্যতে সম্প্ৰতি যোৱা দুটামান বছৰৰ পৰা সাহিত্য সভাৰ সভাপতি আৰু সম্পাদক পদৰ বাবে অনু্ষ্ঠিত নিৰ্বাচনত অপ্ৰীতিকৰ পৰিস্থিতিৰ উদ্ভৱ হৈছে। এনে এক লাভাজনক অৰ্থনৈতিক পৰিৱেশৰ উমান পায়েই অসমীয়া সাহিত্য চৰ্চাৰ সৈতে পোনপটীয়াকৈ জড়িত নথকা আনকি ব্যৱসায়ীক ব্যক্তিও অসম সাহিত্য সভাৰ সভাপতি পদত নিৰ্বাচিত হৈছে, তেখেতকৈ বহু গুণে যোগ্য ব্যক্তিক নিৰ্বাচনত পৰাজিত কৰি। কিন্তু এসময়ত অসম সাহিত্য সভাৰ সভাপতি বুলি কলে যি এক সন্মান তথা বিশেষ দৃষ্টিৰে ব্যক্তি এজনক অসমৰ ৰাইজে চাইছিল সেয়া যে চকুৰ আগতে ক্ৰমে নোহোৱা হৈ পৰিছে। আনকি বৰ্তমান সচেতন নগণ্য এচাম ব্যক্তিৰ বাদে বাকী জনতাৰ উক্ত বিষয়টোৰ প্ৰতিয়েই কোনো গুৰুত্ব নোহোৱা হৈ পৰিছে। এনেকুৱা হৈ পৰিছে যে আপোনাৰ মোৰ চুবুৰীৰ বিভিন্ন সংস্থা বা সমিতিবোৰৰ সভাপতি পদবীটো যেনে, অসম সাহিত্য সভাৰ সভাপতিৰ পদটোও যেন ঠিক একেই পদবী হৈ পৰিছে। পাৰ্থক্য আপোনাৰ মোৰ চুবুৰীৰ বা স্থানীয় অঞ্চলৰ সভাপতিজনে আপোনাৰ মোৰ কথাতো গুৰুত্ব দিয়ে কিন্তু অসম সাহিত্য সভাৰ সভাপতিয়ে আপোনাৰ মোৰ কথাত গুৰুত্ব দিয়া দূৰৰে কথা আনকি তেওঁলোকৰ আপোনাৰ মোৰ কথা শুনিবলৈ আহৰিয়েই নাই।

 

(সৰভোগ, ৭ ফেব্ৰুৱাৰী ২০২৫)

***************

আঘোণৰ নষ্টালজিয়া

আঘোণৰ নষ্টালজিয়া+

আঘোণ যে

অসমীয়া গ্ৰামীণ জীৱনৰ প্ৰাণস্পন্দন!! 

আঘোণে গাঁৱৰ মাটি-পানীৰ সৈতে চিনাকী প্ৰতিগৰাকীকে

কৰি তোলে আবেগ-বিহ্বল

আঘোণৰ পথাৰখন দেখিলেই যেন

'লেছেৰি বুটলা' সময়ৰ কথকতাত বিলীন হয়

জীৱনৰ প্ৰাচুৰ্যময়তাৰ এখন অচিনাকী পৃথিৱী 

আঘোণে ৰিঙিয়াই মাতে মোক

মোৰ শৈশৱ-কৈশোৰ সেই সময়বোৰলৈ

য'ত জীৱনৰ অলেখ সমস্যাৰ গভীৰতাতো প্ৰতিপল জীৱন জীয়াৰ

ন-উদ্যম আৰু প্ৰেৰণাই জীপ লয় 

#শৈশৱ_কৈশোৰত আঘোণৰ পথাৰত

এনেয়ে বাগৰা, লুকা-ভাকু খেলা, মা-দেউতাহঁতলৈ পানী নি দিয়া আদি

ক'ত যে কাম নাছিল আমাৰ..

স্কুলৰ পৰা আহিয়েই পথাৰত ধান দাই থকা

মা-মাহীহঁতে সৈতে ৰবাব টেঙা, চাহ-ভাতৰ সোৱাদ ল'বলৈ দৌৰ মৰা সময়বোৰ

বাৰু ক'ত লুকাল..

সেই দিনবোৰত ধানৰ পাত আৰু নৰাই কটা হাত-ভৰিত

সন্ধিয়া পানী লাগিলে হোৱা চিট চিটনিবোৰৰ আমেজ

আজিৰ সময়ৰ নিমিলা সমীকৰণত বন্ধা.. 

চুবুৰীৰে প্ৰতিঘৰৰে 'ন খোৱা' ৰ আয়োজনত

আমাৰ দৰে কিশোৰবোৰৰ স্বেচ্ছামূলক ব্যস্ততাৰ সময়বোৰ

এতিয়া যেন কোনোবা অচিন অজানা দেশৰ #সাধুকথা

#নৰা_পেঁপা বজোৱা শৈশৱে মেলানি মাগিলে

চকুৰ সন্মুখতে ক্ৰমে সলনি হ'বলৈ ধৰিলে মোৰ বুকুৰ আপোন চিনাকী গাঁৱৰ পথাৰবোৰ

সোণগুটিৰ ভৰত দোঁ খাই থকা

আঘোণৰ পথাৰবোৰৰ যে

এতিয়া গোটেই বছৰ জুৰি উদং হোৱাৰ পাল

লাহে লাহে কৃষকৰ পথাৰবোৰত

চিনাকী অচিনাকীজনৰ চকু পৰিল

গঢ়ি উঠিছে বৃহৎ অট্টালিকা

গঢ়ি উঠিছে উদ্যোগিক প্ৰতিষ্ঠান

পৰিৱৰ্তনৰ বতাহে অসমৰ গাঁৱবোৰকো ভালকৈয়ে কোবাই গ'ল

লগত ক্ৰমান্বয়ে লৈ গৈছে আঘোণৰ প্ৰাণ চঞ্চলতাকো

আমাৰ সকলোৰে চকুৰ সন্মুখতে!!

(সৰভোগ/ ১০ ডিচেম্বৰ ২০২৪)

*******

বুলন ককাইদেউৰ মৃত্যুত...

বুলন ককাইদেউৰ মৃত্যুত সামাজিক মাধ্যমত হোৱা পাৰ্শ্বক্ৰিয়া আৰু ব্যক্তিগত ভাৱনা

 

এজন মানুহৰ মৃত্যুতো সাধাৰণ জনতা ইমান শোকাভিভূত হ’ব পাৰে - যিটো বৰ্তমান সময়ত কল্পনা কৰিব নোৱাৰি। যি সময়ত বাতৰি-কাকত, বৈদ্যুতিন মাধ্যম আনকি চকুৰ সন্মুখতে কত মানুহৰ মৃত্যু দেখিও আমি সাধাৰণ ঘটনা হিচাপে মানি ল’বলৈ শিকিছোঁ, সেই সময়তে অসমৰ এখন অখ্যাত ঠাইৰ এজন প্ৰায় সাধাৰণ মানুহৰ মৃত্যুত আজিৰ দিনটোত বিশেষভাৱে সামাজিক মাধ্যমত মানুহৰ প্ৰতিক্ৰিয়া দেখি আচৰিত নহৈ নোৱাৰিলোঁ। আজিৰ দিনটোতে আকাশবাণীৰ বাতৰিৰ পৰা আৰম্ভ কৰি সংবাদ-পত্ৰৰ ইলেকট্ৰনিক সংস্কৰণ, বৈদ্যুতিন সংবাদ মাধ্যম আদিৰ সংবাদতো প্ৰত্যক্ষ কৰিলোঁ - একেজন মানুহৰ বিষয়ে বিভিন্নজনৰ শোকবিহ্বল চিন্ত-ভাৱনাবোৰ। যিজন মানুহ কোনো মন্ত্ৰী, বিধায়ক, ৰাজনৈতিক নেতা কিম্বা সমাজৰ তথাকথিত বিয়াগোম বুদ্ধিজীৱী নতুবা সমাজক জ্ঞান প্ৰদানেৰে মানৱ সম্পদ গঢ়া তথাকথিত প্ৰখ্যাত শিক্ষকো নাছিল; আনকি বহুতৰ দৰে সভা-সমিতিয়ে শিৰ ফুলাই নিজে সমাজিক কাম-কাজত বিশেষ অৱদান আগবঢ়োৱা বুলিও জাহিৰ কৰি ফুৰা নাছিল। সেয়েহে এইখিনিতে প্ৰশ্ন হয় - এই প্ৰায় সাধাৰণ মানুহজনৰ মৃত্যুত অসমৰ এচাম জনতা ইমান আৱেগিক কিয়!!

এই ব্যক্তিজন আছিল অসমৰ পূব প্ৰান্তৰৰ এখন মফচলীয়া চহৰ নাহৰকটীয়াৰ বাসিন্দা। সৰু চহৰ এখনৰ পৰা সাংবাদিকতা আৰম্ভ কৰিও নিজস্ব স্বকীয়তাৰ বাবে অসমত বিশেষ পৰিচয় গঢ়িবলৈ সক্ষম হোৱা এই ব্যক্তিগৰাকীৰ নাম আছিল বুলন কুমাৰ শইকীয়া। বৰ্তমান সময়ৰ এক সৰ্বজন পৰিচিত সামাজিক মাধ্যম ফেচবুকৰ লিখনিৰ জৰিয়তে চিনি পোৱা এই মানুহজনক ব্যক্তিগতভাৱে কোনো দিনে লগ পোৱা নাছিলো। বয়সত জেষ্ঠ্য বাবে বুলনদা বুলিয়েই ফেচবুকত সম্বোধন কৰিছিলোঁ। বুলনদাৰ বাসস্থান নাহৰকটীয়াৰ পৰা মোৰ জন্মস্থান ধেমাজিৰ দূৰত্ব বৰ বেছি নহয়, কিন্তু কৰ্মসূত্ৰে অসমৰ পশ্চিম প্ৰান্তৰত থাকিবলগা হোৱাত বন্ধত ঘৰলৈ গ’লে বুলনদাক লগ কৰাৰ পৰিকল্পনা কেইবাবাৰো কৰিও সময়ৰ অভাৱ, এলাহ আদি নানানটা অজুহাতত তেখেতক লগ কৰা নহ’লগৈ। আৰু আজি পুৱা মৃত্যুৰ সংবাদ প্ৰথমে আকাশবাণী ডিব্ৰুগড় কেন্দ্ৰৰ পুৱা ৭.৫০ বজাৰ আঞ্চলিক বাতৰিত শুনি বিশ্বাস কৰিব পৰা নাছিলোঁ। লগে লগে ফেচবুক খুলিয়েই বিভিন্নজনৰ বাৰ্তাৰোৰ দেখি মনটো থিৰেৰে ৰাখিব পৰা নাছিলোঁ। নিজকে নিজে কৈছো - কেৱল মাত্ৰ এলাহ আৰু মিছা অজুহাতৰ বাবেই মুখা-মুখিকৈ বহি বুলনদাৰ সৈতে দুআষাৰ কথা পতাৰ ইচ্ছাতো মনৰ মাজতে শেষ হৈ গ’ল।

সাধাৰণভাৱে চাবলৈ গ’লে তেখেত মোৰ কোনো আত্মীয় অথবা কোনোবা ভাল বন্ধুও নাছিল। গতিকে তেখেতৰ মৃত্যুত মই বৰ বিশেষ দুখ কৰিব লগা বা মনটো অস্থিৰ হ’ব লগা বিশেষ একো নাই। কিন্তু সামাজিক মাধ্যমত তেখেতৰ চিন্তা উদ্ৰেককাৰী লেখাসমূহ তথা ব্যঙ্গাত্মক কথাবোৰৰ মাজেৰে আমাৰ সমস্যাবোৰৰ বিষয়ে আমাকে সচেতন কৰাৰ প্ৰয়াসবোৰে নজনা-নুবুজাকৈয়ে তেখেতৰ সৈতে এক আত্মিক বান্ধোনৰ সৃষ্টি কৰিছিল। এনে এক অদৃশ্য আৰু অজানা আপোন বান্ধোনৰ মাজত সোমাই পৰা এজন ব্যক্তিৰ কায়িক মৃত্যুৱে মনলৈ দুখবোধ তথা এক বুজাব নোৱাৰা পৰিস্থিতি অনাত অস্বাভাৱিকতা নিশ্চয় একো নাই।

এতিয়া মনতে জুকিয়াই চাওঁতে দেখা পাইছোঁ যে তেখেতে সামাজিক মাধ্যমৰ লেখনিৰ জৰিয়তে যিবোৰ চিন্তা আৰু সমালোচনা ৰাইজলৈ আগবঢ়াই দিছিল সেইখিনিয়ে মোৰ দৰে বহুতৰে অন্তৰত দাগ কাটি গৈছিল। অসম আৰু অসমীয়াক অন্তঃকৰণেৰে ভালপোৱা বুলনদাৰ লেখনিৰ মাজত নিহিত হৈ থকা তীব্ৰ বাক্যবাণ, শাণিত ব্যংগ আৰু তথ্যৰ চমকপ্ৰদ উপস্থাপনে সকলোকে কথাবোৰ নকৈ ভাবিবলৈ আৰু চিন্তা কৰি চাবলৈ বাধ্য কৰাইছিল। হাতত কলম তুলি লৈয়ে জাতিটোৰ আৰু ৰাজ্যখনৰ সাম্প্ৰতিক সমস্যাবোৰ সমাধানৰ প্ৰতি তেখেতে নিজৰ সাধ্যানুসৰি কৰা কামবোৰৰ মাজেৰে নিজৰ জাতীয় দায়বদ্ধতাৰ পৰিচয় দাঙি ধৰিছিল সকলোৰে সন্মুখত। যাৰ ফলশ্ৰুতিত এনে এজন সৎ সাহসী আৰু নিজৰ আজানিত সমাজৰ সাধাৰণজনৰ বলিষ্ঠ কন্ঠ হ’বলৈ ধৰা এজন ব্যক্তিৰ আকস্মিক মৃত্যুৰ বাতৰিটোৱে তেখেতক জনা-নজনা প্ৰায় সকলো স্তৰৰ লোককে ব্যথিত কৰি তুলিছে। তেখেতৰ মৃত্যুৰ পিছতে সামাজিক মাধ্যমত নিজৰ মত ব্যক্ত কৰা বিভিন্নজনৰ চিন্তা-ভাৱনাবোৰ দেখি আৰু সংবাদ মাধ্যমৰ বাতৰি তথা বিভিন্ন দল-সংগঠনৰ মতামতবোৰ শুনি ভাবিবলৈ মন গৈছে যে সমাজত সততা আৰু ন্যায়ৰ পক্ষত থকা মানুহৰ সংখ্যাতো এতিয়া আগৰ দৰে গৰিষ্ঠ হৈয়ে আছে। সেয়েহে হয়তো তেখেতৰ সাহসী স্থিতি আৰু স্পষ্টবাদিতাৰ বাবে প্ৰায়ে ৰাইজৰ আগত বিপাঙত পৰিবলগীয়া হোৱা শাসক-বিৰোধী উভয় পক্ষৰে বহু ৰাজনৈতিক নেতা-মন্ত্ৰীয়েও তেখেতৰ মৃত্যুত শোক প্ৰকাশ কৰিছে।

২০২২ চনৰ পৰা যকৃতৰ জটিল ৰোগত ভুগি থকা বুলন শইকীয়া নামৰ সাংবাদিক হিচাপ জনাজাত ব্যক্তিজনে সাংবাদিকতাকে কেৱল বৃত্তি হিচাপে লোৱা নাছিল, সাংবাদিকতাৰ জৰিয়তে আনক সংস্থাপন দিয়াৰ লগতে সত্য, শুদ্ধ বাতৰি পৰিৱেশনৰ বাবে তেখেতে ৰাইজৰ সহায়-সহযোগিতাৰে ‘GROUND NEWS’ নামেৰে এক সংবাদ সংস্থাও গঢ়ি তুলিছিল। অৱশ্যে ৰোগটোৱে তেখেতৰ এই প্ৰচেষ্টাক বৰ বেছি দূৰলৈ প্ৰসাৰিত কৰাত বাধা হৈ থিয় দিলে। সাংবাদিকতাৰ সমান্তৰালভাৱে বিভিন্ন সামাজিক কাম-কাজতো তেখেত সক্ৰিয়ভাৱে জড়িত হৈ আছিল। দুৰ্দান্ত সাহসী, সৎ, ন্যায়-নিষ্ঠ আৰু অত্যন্ত খাদ্যৰসিক এই মানুহজনে শেহতীয়াকৈ অসমৰ থলুৱা খাদ্য-সম্ভাৰক লৈ ‘SWAD ASSAM’ নামেৰে ঘৰুৱাভাৱে প্ৰস্তুত কৰা খাদ্য বিতৰণৰ এটা ক্ষুদ্ৰ ব্যৱসায়ো আৰম্ভ কৰিছিল। ইয়াৰোপৰি তেখেত সাহিত্যক হিচাপেও ৰাইজৰ মাজত জনাজাত আছিল। তেখেতে ‘মোৰ আইৰ নাম মিলিকি বৰুৱা’ শীৰ্ষক কাব্য সংকলন, উত্তৰ-পূৰ্বাঞ্চলৰ ভূ-ৰাজনৈতিক পৰিস্থিত তথা সন্ত্ৰাসবাদী সমস্যাৰ গুৰি কথাবোৰক লৈ ৰচনা কৰা ‘আৰাকান ইন্টেল’ শীৰ্ষক উপন্যাসখন আৰু থলুৱা খাদ্য-সম্ভাৰক লৈ ৰচন কৰা গ্ৰন্থ  ‘আমাৰ জুতি-বুধি’ আদিৰ বিভিন্ন গ্ৰন্থৰ জৰিয়তে অসমীয়া সাহিত্য জগতখনতো নিজৰ স্বকীয় পৰিচয় দিবলৈ সক্ষম হৈছিল। ফেচবুকতে তেখেতে উত্তৰ-পূবৰ সন্ত্ৰাসবাদক লৈ আৰম্ভ কৰিছিলি ‘ছেইকজিন ছাইৱাম’ শীৰ্ষক আন এখন উপন্যাস। সম্প্ৰতি এই বছৰৰ গ্ৰন্থমেলাতে ‘চি-ইন-চি’ শিৰোনামৰ গ্ৰন্থ এখন প্ৰকাশৰ বাবে সাজু হোৱা বুলি লেখকে নিজে ব্যক্তি কৰিছিল। পিছে শেষৰ দুখন গ্ৰন্থৰ কাম আধৰুৱাকৈ এৰিয়েই তেখেতে ৰোগৰ ওচৰত হাৰ মানিলে। সততা আৰু ন্যায়ৰ পক্ষত চিৰদিন থকা এই ব্যক্তিজনে ইচ্ছা কৰা হ’লে বৰ্তমান সময়ৰ যিকোনো এজন তথাকথিত হাত দীঘল সাংবাদিকৰ দৰেই চৰকাৰী পক্ষৰ নেতা কিম্বা মন্ত্ৰী-বিধায়কৰ কাষলৈ গৈ নিজৰ ৰোগৰ সমাধান সূত্ৰ অতি সহজতেই উলিয়াব পাৰিলে হয়। কিন্তু অলপ বেলেগ ধাতুৰে গঢ়া এই বিশেষ ব্যক্তিজনে জটিল ৰোগত আক্ৰান্ত হৈ মৃত্যুৰ ক্ষণ গণি থাকিও শেষলৈকে ৰাজ্যৰ শাসক তথা বিৰোধীপক্ষক নিজৰ শাণিত ব্যঙ্গ তথা কঠোৰ সমালোচনাৰে থকা-সৰকা কৰিবলৈ নেৰিলে।

বুলনদাৰ অকাল মৃত্যুত সচাঁ অৰ্থতে অসম আৰু অসমীয়াই এজন ভাল মানুহ সোনকালে হেৰুৱালে। জাতিটোৰ আজিৰ জটিল সন্ধিক্ষণত যাৰ কৰিবলগীয়া বহু কামেই আধৰুৱা হৈ থাকি গ’ল। বুলনদা আপোনাৰ চিন্তা আৰু কৰ্মৰ নমুনা সদায় আমাৰ দৰে বহু সাধাৰণ মানুহৰ মন-মগজুত চিৰদিন থাকি যাব।

 

(২৮ নবেম্বৰ, ২০২৪/সৰভোগ)

***********

অসমীয়া ভাষাক ধ্ৰুপদী ভাষাৰ স্বীকৃতি আৰু আমাৰ ভাৱনা

 

অসমীয়া ভাষাক ধ্ৰুপদী ভাষাৰ স্বীকৃতি আৰু আমাৰ ভাৱনা

২০২৪ চনৰ ৩ অক্টোবৰ তাৰিখে ভাৰত চৰকাৰৰ সাংস্কৃতিক মন্ত্ৰণালয়ৰ নিৰ্দেশ মৰ্মে মাৰাঠী, পালি, প্ৰাকৃত আৰু বাংলা ভাষাৰ লগতে অসমীয়া ভাষাই ধ্ৰুপদী ভাষাৰ মৰ্যাদা লাভ কৰে। এজন অসমীয়া ভাষী হিচাপে ব্যক্তিগতভাৱে এই বিষয়টোৱে মোক গৌৰৱাম্বিত কৰিছে আৰু মই সুখী হৈছো চৰকাৰ এনে স্বীকৃতিত।

কিন্তু এই গৌৰৱ আৰু সুখেই আমাৰ ভাষাটোক ভৱিষ্যতলৈ সুৰক্ষিত কৰি ৰাখিব বুলি আমি নিজকে নিজে নিশ্চিতি দিব নোৱাৰো। সেই বাবেই আমি নিজৰ ভাষাৰ এই গৌৰৱৰ ক্ষণ আৰু সুখৰ সময়তে এটা কথা অন্তঃকৰণেৰে উপলব্ধি কৰাতো দৰকাৰ যে নিজৰ ভাষাটোৰ প্ৰয়োগত আমি সদা সচেতন হ'ব লাগে আৰু সমান্তৰালভাৱে নিজৰ ভাষাটোৰ প্ৰতি সৰ্বদা শ্ৰদ্ধাশীল হোৱাতোও অত্যন্ত জৰুৰী।

ভাৰতবৰ্ষত ভাষা এটাৰ ধ্ৰুপদী মৰ্যদাই চৰকাৰীভাৱে ভাষাটোৰ গৱেষণা, ভাষাৰ ঐতিহাসিক, সাংস্কৃতিক তথা ৰাজনৈতিক-সামাজিক সমলসমূহ সংৰক্ষণৰ ক্ষেত্ৰত আমাক সহায় কৰে। সমান্তৰালভাৱে ধ্ৰুপদী ভাষাটোৰ বিকাশ, সমৃদ্ধি আৰু প্ৰসাৰৰ বাবে চৰকাৰী পৃষ্ঠপোষকতাত আৰ্থিক সাহাৰ্য্য লাভ কৰাৰ নিশ্চিতি, দেশৰ কেন্দ্ৰীয় বিশ্ববিদ্যালয়সমূহত ধ্ৰুপদী ভাষাটোৰ এখন আসন প্ৰতিষ্ঠা কৰাৰ বাবে বিশ্ববিদ্যালয় অনুদান আয়োগে অনুৰোধ জনাব আৰু ধ্ৰুপদী ভাষাটোৰ বাবে আন্তঃৰাষ্ট্ৰীয় আৰু ৰাষ্ট্ৰীয় বঁটা প্ৰদানৰ ব্যৱস্থাও চৰকাৰে কৰিব। ইমানখিনি চৰকাৰী পৃষ্ঠপোষকতাত ভাৰতবৰ্ষত ধ্ৰুপদী ভাষাৰ ক্ষেত্ৰত ল’ব লগা বা লোৱা ব্যৱস্থা। কিন্তু এই ব্যৱস্থাবোৰে ভাষা এটাক সুৰক্ষিত কৰিব বুলি আমি নিশ্চিত হ'ব পাৰোনে? নিশ্চয়কৈ নোৱাৰো। কাৰণ ইতিমধ্যে ২০০৫ চনতে ভাৰতবৰ্ষৰ কেন্দ্ৰ চৰকাৰে ধ্ৰুপদী মৰ্যাদা প্ৰদান কৰা সংস্কৃত ভাষা আজি বিলুপ্তিৰ গৰাহত। নামমাত্ৰ জনসংখ্যাৰ মাজতহে বৰ্তমান ভাৰতবৰ্ষত সংস্কৃত ভাষাৰ প্ৰচলন আছে। আনকি যোৱা ৩ অক্টোবৰত অসমীয়া ভাষাৰ লগতে ধ্ৰুপদী ভাষাৰ স্বীকৃতি দিয়া পালি আৰু প্ৰাকৃত ভাষা বৰ্তমান ভাৰতবৰ্ষত সম্পূৰ্ণ বিলুপ্ত বুলিয়েই আমি ক'ব পাৰোঁ।

 

সেয়েহে আমি একেষাৰতে ক'ব পাৰো যে বৰ্তমানৰ এটা জীৱন্ত ভাষা 'অসমীয়া ভাষা'ক পৃথিৱীৰ পৰা ক্ৰমান্বয়ে বিলুপ্ত হৈ যোৱা ভাষাসমূহৰ দৰে বিলুপ্তিৰ পৰা ৰক্ষা কৰিবলৈ হ’লে চৰকাৰে দিয়া ধ্ৰুপদী স্বীকৃতিয়ে বৰ এটা বিশেষ সহায় নকৰে, যদিহে আমি অসমীয়া ভাষী প্ৰত্যেকেই নিজে ভাষাটোৰ প্ৰতি শ্ৰদ্ধাশীল আৰু সচেতন নহওঁ।

বৰ্তমান প্ৰচলিত অসমীয়া ভাষাটোৰ ভৱিষ্যতক লৈ ভাষাটোৰ প্ৰতি সচেতন প্ৰতিজন ব্যক্তিয়ে শংকাত ভুগিছে। যি সময়ত প্ৰযুক্তিবিদ্যাৰ অভূতপূৰ্ব উন্নতি তথা সৰ্বসাধাৰণৰ মাজত ইয়াৰ প্ৰসাৰে অসমীয়া ভাষাটোৰ ব্যাপক ব্যৱহাৰ সামাজিক মাধ্যমত হোৱাতো সহজ কৰি তুলিছে। যিটো যিকোনো এটা ভাষাৰ বাবেই অতি উৎসাহব্যঞ্জক খবৰ। সেই সময়তে কিন্তু সমান্তৰালভাৱে ভাষাটোৰ প্ৰতি ই দুঃখবোৰ কঢ়িয়াই আনিছে। কাৰণ সামাজিক মাধ্যমত ব্যৱহৃত ভাষাৰ ব্যাপক ভুল ব্যৱহাৰে দিনক দিনে ভাষাটোলৈ অশনি সংকেত কঢ়িয়াই আনিছে। ভাষাটোৰ শুদ্ধ ৰূপবোৰৰ ব্যৱহাৰ ক্ৰমান্বয়ে আমাৰ মাজৰ পৰা হেৰাই যোৱাৰ উপক্ৰম ঘটিছে। কাৰণ ইংৰাজী ভাষাৰ অগ্ৰাসানে যিদৰে পৃথিৱীৰ বহু ভাষাক মানৱ সমাজৰ পৰা বিলুপ্ত কৰি দিছে সেইদৰে ইয়াৰ ব্যাপক ব্যৱহাৰে অসমীয়া ভাষাৰ বৰ্তমান ৰূপটোক লিখিত সাহিত্যক বৰ বেছিকৈ গ্ৰাস কৰিব নোৱাৰিলেও সমাজিক মাধ্যমত ই ব্যাপক প্ৰভাৱ পেলাবলৈ সক্ষম হৈছে। এনে এক প্ৰেক্ষাপটত ভাষাটোলৈ অহা বিশেষ স্বীকৃতিৰ গইনা লৈয়ে আমি প্ৰতিজন অসমীয়া তথা অসমীয়া ভাষীয়ে নিজৰ ভাষাটোৰ স্বকীয়তাৰ প্ৰতি সচেতন দৃষ্টি ৰাখি ইয়াক সৰ্বদা অক্ষত ৰখাৰ বাবে যৎপৰোনাস্তি চেষ্টা কৰাৰ বাবে পণ লোৱাৰ প্ৰয়োজন। লগতে ইংৰাজী তথা হিন্দী ভাষাৰ প্ৰভাৱৰ পৰা ইয়াক কেনেদৰে মুক্ত কৰি ৰাখিব পাৰি তাৰ বাবেও এক বিশদ তথা ফলপ্ৰসু পৰিকল্পনা যুগুত কৰাতোওঁ বৰ্তমান সময়ত অত্যন্ত প্ৰাসংগিক।

 

(৭ নবেম্বৰ ২০২৪, সৰভোগ)

************

অসমৰ ট্ৰেডিং জালিয়াতি আৰু আৰক্ষীৰ এনকাউন্টাৰ

 

অসমৰ ট্ৰেডিং জালিয়াতি আৰু আৰক্ষীৰ এনকাউন্টাৰৰ মান্যতা

 

(ক)

সাম্প্ৰতিক অসমৰ সৰ্বত্ৰতে চৰ্চিত বিভিন্ন বিষয়ৰ ভিতৰত অন্যতম প্ৰধান বিষয়টোৱেই হৈছে ট্ৰেডিং জালিয়াতি। অতি কম সময়তে নিজকে ধনী কৰাৰ মানসিকতাৰ পৰিণতিতে অসমৰ চুকে-কোণে অতি সাম্প্ৰতি গা কৰি উঠিছে ন ন ট্ৰেডিং জালিয়াতিৰ কাহিনী। পাৰিলে ৰাতিটোৰ ভিতৰতে দেশৰ নাম থকা সম্পত্তিশালী ব্যক্তি হৈ উঠাৰ কল্পনাতে মানুহে কোনো বাচ-বিচাৰ নকৰাকৈ এনে জালিয়াতিৰ ফাণ্ডত ভৰি দিছে। এনেবোৰ ফাণ্ডত ভৰি দিয়াসকলৰ গৰিষ্ঠ সংখ্যকৰে ট্ৰেডিঙৰ বিষয়ে নুন্যতম জ্ঞানো যে নাই সেয়া আপুনি মই কাষে-পাজৰে অলপ অচৰ বিচাৰ কৰিলেই উলাই পৰিব। তেওঁলোকৰ বহুতেই হয়তো ট্ৰেডিঙ খাই নে পিন্ধে সেয়াও নাজানে। তেখেতসকলে মাত্ৰ জানে যে তেওঁলোকে কোনোবা এজনক দিয়া নিজৰ উপাৰ্জনখিনি কম সময়ৰ ভিতৰতে আগতকৈ বেছি হৈ তেওঁলোকৰ হাতত আহি পৰিবহি। লাগিলে সেয়া হেজাৰ বা লাখ, যি পৰিমাণেই নহওক কিয়!

এনেকৈ জালিয়াতিৰে টকা ঘটি থকাসকলে অসমত কেৱল এতিয়াই নহয়, বহু আগৰে পৰা এনেকুৱা অন্য পদ্ধতিৰে হলেও টকা ঘটিয়েই আছে। কিন্তু ৰাজ্য চৰকাৰ বা চৰকাৰৰ প্ৰশাসন যন্ত্ৰই এনেবোৰ কাণ্ডৰ উমান কিয় আগতীয়াকৈ নাপায়!! ৰাজ্য চৰকাৰে জনসাধাৰণৰ সৰ্বাঙ্গীন উন্নয়নৰ বাবে বিভিন্ন আঁচনিৰ উদ্ভাৱন কৰাৰ লগতে নতুন নতুন পৰিকল্পনাও যুগুত কৰি উলিয়াই আছে ভিন ভিন সময়ত। কিন্তু এনেবোৰ পৰিকল্পনা আৰু আঁচনি বাস্তৱায়িত কৰিবলৈ যাওঁতে ৰাজ্যখনৰ চৌপাশ ঘটি থকা বিভিন্ন দুষ্কাৰ্যৰ সমান্তৰালভাৱে চলি থকা ট্ৰেডিং কেলংকাৰীৰ বিষয়ে নজনাটো কোনোপধ্যেই বিশ্বাস কৰিব নোৱাৰি। কাৰণ  কোনোবা এজন বা দুজন ব্যক্তিয়ে চৰকাৰ নতুবা মন্ত্ৰী-বিধায়কৰ বিৰুদ্ধে দুআষাৰ বাক্য সমাজিক মাধ্যমত মন্তব্য কৰাৰ বাবেই চৰকাৰী ৰঙাঘৰৰ ভাত খাব লগা পৰিস্থিতিৰ সৃষ্টি হোৱা ৰাজ্যখনৰ প্ৰশাসনযন্ত্ৰই ট্ৰেডিং দৰে বিষয়বোৰত চকু নিদিয়া বুলিলেও আমি মানি লমেই বা কিয়!! নহলে এনেকুৱা নহয়তো কথাবোৰ যে ৰাজ্যৰ বৃহৎ ব্যৱসায়ীক গোষ্ঠী, ৰাজনৈতিক নেতা-মন্ত্ৰী বা তেওঁলোকৰ অঙহী-বঙহীৰ বৃহৎ পৰিমাণৰ নামী-বেনামী অৰ্থ এনে নীতি বৰ্হিভূত ট্ৰেডিং ব্যৱসায়বোৰৰ সৈতে জড়িত হৈ থকা বাবেই চৰকাৰৰ ফালৰ পৰা লব লগা ব্যৱস্থাবোৰ লোৱাত হীন-দেৰী কৰি থকা হৈছে নেকি!!

আমি আশাবাদী যে সোনকালেই চৰকাৰ তথা প্ৰশাসনৰ চকু মুকলি হব আৰু ট্ৰেডিং জালিয়াতিৰ দৰে হঠাতে অস্বভাৱিক উপায়েৰে টকা ঘটাৰ নীতি-বৰ্হিভূত কৰ্ম-কাণ্ডৰ সৈতে জড়িত পুঠি-খলিহনাৰ লগতে ৰৌ-বৰালিকে আদি কৰি প্ৰতিজন ব্যক্তিয়েই ন্যায়ালয়ৰ জৰিয়তে উপযুক্ত শাস্তিৰ সন্মুখীন হব। সৰ্বোপৰি এনেবোৰ জালিয়াতিৰ ফান্দত ভৰি দি অসমৰ খাটি খোৱা বহু সাধাৰণ জনতা এইবাৰ যিদৰে সৰ্বস্বান্ত হৈছে, এনেবোৰ পৰিস্থিতিৰ যাতে পুনৰাবৃত্তি নঘটে তাৰ বাবে ৰাইজক সজাগ কৰাৰ বাবে চৰকাৰ তথা প্ৰশাসনৰ জৰিয়তে সজাগতা সৃষ্টিৰ প্ৰয়াস কৰাতোও অতি দৰকাৰী হৈ পৰিছে।

 

(খ)

এসময়ত বাতৰি কাকতত সঘনে পঢ়িবলৈ পোৱা আৰু এতিয়াও মাজে মধ্যে ভাৰতবৰ্ষৰ বিহাৰ, উত্তপ্ৰদেশ, মহাৰাষ্ট্ৰৰ দৰে ৰাজ্যত সংঘটিত আৰু এসময়ত হিন্দী চিনেমাবোৰৰ সুলভ দৃশ্য, অপৰাধীক আৰক্ষীয়ে আটক কৰি আৰক্ষী থানা বা জেললৈ আনি থকা অৱস্থাত পলাবলৈ চেষ্টা কৰাৰ সময়ত ধৰিবলৈ যাওতে আৰক্ষীৰ গুলিত অৰ্থাৎ এনকাউন্টাৰত অপৰাধীৰ মৃত্যুৰ ঘটনা অসমত যোৱা কেইটামান বছৰৰ পৰা অতি স্বাভাৱিক হৈ পৰিছে।

আনকি সামাজিক মাধ্যমত এনে খবৰবোৰ পৰিৱেশন কৰাৰ পৰৱৰ্তী সময়ত এনে হত্যা বা এনকাউন্টাৰক স্বীকৃতি দি মন্তব্য কৰাৰ লোকৰ সংখ্যাতো অতি দ্ৰুত গতিত বাঢ়ি অহাতো সকলোৰে দৃষ্টিগোচৰ হৈছে। আনকি এনে হত্যাৰ সৈতে জড়িত আৰক্ষীজনক বা আৰক্ষীৰ লোকসকলক সকলোৱে সামাজিক মাধ্যত প্ৰশংসাৰে উপচায় দিয়াটোও এতিয়া এক স্বাভাৱিক পৰিঘটনা আমাৰ বাবে। তাতোতকৈ উল্লেখযোগ্য বিষয়টো হল এন ঘটনাৰ সৈতে জড়িত আৰক্ষীজনক আইন বৰ্হিভূত ঘটনাৰ বাবে বিভাগীয় তদন্ত কৰাৰ আগতেই বৰ্তমান তৎকালীনভাৱে কাৰ্যকৰী হোৱাকৈ চাকৰিত পদোন্নতি দিয়াহে পৰিলক্ষিত হয় বহু সময়ত। আমাৰ ৰাজ্যখনৰ চৰকাৰ তথা জনতাৰ এনেবোৰ কৰ্ম-কাণ্ডই প্ৰকৃততে কি সূচায় এবাৰ নিৰপেক্ষভাৱে ভাবি-চিন্তি চাবলৈ কাৰোবাৰ আহৰি আছেনে আজিৰ তাৰিখত!!

নিশ্চয় নাই! কাৰণ আজিৰ এটা ঘটনাৰ সমৰ্থনত মই মন্তব্য প্ৰদান কৰাৰ পৰৱৰ্তী সময়তে আকৌ বহু নতুন ঘটনাই আমাৰ চৌপাশ তোলপাৰ লগালেই নহয়। আৰু লগে লগে মইও সাজু হৈ উঠিলো সেই ঘটনাটোৰ আগ-গুৰি একো নুশুনা-নজনাকৈ সেই বিষয়টোৰ বিশেষজ্ঞ হৈ উঠিবলৈ। কাৰণ সামাজিক মাধ্যমত মোৰ জনপ্ৰিয়তাই এতিয়া মূল কথা আৰু এই জনপ্ৰিয়তা বিচাৰ কৰাৰ মাত্ৰা হল আপোনাৰ মোৰ মতামতত কোনো কিমান লাইক, শ্বেয়াৰ কৰিছে বা ভিউৰ সংখ্যা। সেয়েহে আপোনাৰ বা মোৰ অন্য বন্ধুসকলে কিবা এটা কৈ বেছিক লাইক, শ্বেয়াৰ বা ভিউ কাঢ়ি লোৱাৰ আগতেই মই মোৰ মন্তব্য যেনে তেনে আগবঢ়োৱাতো যে অতি দৰকাৰী! লাগিলে সেই বিষয়টো সম্পৰ্কে মই বিশেষ একো নাজানোৱেই বা কিয়!! এয়াই হল আমাৰ ব্যক্তিগত সচেতনা তথা সামাজিক দায়বদ্ধতাৰ নমুনা। আৰু এনে দায়বদ্ধহীনতা আৰু অসচেতনতাৰ কুপ্ৰভাৱ আমাৰ সমাজৰ বিভিন্ন কৰ্ম-কাণ্ডত স্পষ্টকৈ দৃষ্টিগোচৰ হোৱা পৰিলক্ষিত হৈ উঠিছে।

 

(১৫ ছেপ্টেম্বৰ ২০২৪/সৰভোগ)

*********

পেৰিছ অলিম্পিকৰ ভাৱনা

পেৰিছ অলিম্পিকৰ ভাৱনা

 

ফ্ৰান্সৰ ৰাজধানী পেৰিছত যোৱা ২২ জুলাইৰ পৰা ১১ আগষ্ট ২০২৪লৈ অনুষ্ঠিত ২২ দিনীয়া বিশ্ব ক্ৰীড়াৰ অভূতপূৰ্ব সমাৰোহখনৰ কালি ৰাতি আনুষ্ঠানিকভাৱে সমাপ্ত হ'ল। অলিম্পিক ২০২৪ৰ সফল সমাপ্তি ঘটিল। অনাগত ৪ বছৰ অপেক্ষা কৰিব লাগিব আকৌ এখন নতুন ক্ৰীড়াৰ মহাসংগ্ৰাম উপভোগ কৰিবলৈ।

এইবাৰৰ পদক তালিকাত প্ৰথম স্থান দখলৰ যুঁজখন বিশ্বৰ দুই মহা শক্তিধৰ দেশ আমেৰিকা আৰু চীনৰ মাজত অলিম্পিকৰ শেষৰ দিনটোলৈকে অব্যাহত থাকিল। মূৰকত মহিলা বাস্কেটবলত ফ্ৰান্সৰ সৈতে হোৱা তীব্ৰ প্ৰতিদ্বন্দিতাত জয়ী হৈ প্ৰতিযোগিতাৰ শেষৰ সোণৰ পদকটো জয় কৰি আমেৰিকাই পদক তালিকাৰ প্ৰথম স্থান দখল কৰে। দুয়োখন দেশে ৪০টাকৈ সোণৰ পদক দখল কৰে যদিও ৰূপৰ পদক বেছিকৈ দখল কৰাত আমেৰিকা প্ৰথম স্থানত থাকে।

প্ৰথম বা দ্বিতীয় স্থানক বাদ দিলেই আপুনি মই বিশ্বৰ মানচিত্ৰত বিচাৰিব লগা হোৱা বহু দেশে এইবাৰৰ অলিম্পিকৰ পদক তালিকাত উচ্চ স্থান লাভ কৰি দেশবাসীক গৌৰৱান্বিত কৰিছে। অলিম্পিক ক্ৰীড়াৰ ইতিহাসত আমাৰ দেশ অৰ্থাৎ ভাৰতবৰ্ষৰ প্ৰদৰ্শন ভাল নহয় যদিও এইবাৰৰ অলিম্পিকত আগতকৈ কিছু উন্নত প্ৰদৰ্শনৰ আশা কৰা হৈছিল। এনে এক আশালৈ পেৰিছলৈ যোৱা ভাৰতীয় দলৰ পৰা আমাৰো বহুখিনি প্ৰত্যাশা আছিল। পিছে যোৱাবাৰৰ অলিম্পিকৰ তুলনাতো ভাৰতবৰ্ষই পদক তালিকাত এইবাৰ ২২টা স্থান পিছুৱাইছেহে। অৱশ্যে বহুকেইজন যোগ্য আৰু সম্ভাৱনাময় খেলুৱৈৰ পৰাও আমি শেষ মুহূৰ্তত এইবাৰ পদক লাভ কৰিবলৈ সক্ষম নহলোঁ। কিন্তু ইমানতে সন্তুষ্টি লভি কি সামাজিক মাধ্যম, কি বাতৰি-কাকত, কি দূৰদৰ্শন সকলোতে দেশৰ খেলুৱৈসকলৰ প্ৰশংসাত আমি পঞ্চমুখ হৈ পৰিছোঁ।

কিন্তু এবাৰ ভাবি চাওকচোন, জনসংখ্যাৰ দিশেৰে বিশ্বৰ প্ৰথম স্থানত থকা আপোনাৰ-মোৰ আপোন দেশখনৰ ক্ৰীড়াক্ষেত্ৰৰ অৱস্থা বিশ্ব প্ৰেক্ষাপটত আজিও ইমান পুতৌলগা হৈ আছে কিয় বাৰু!! আনহাতে ৰাজনৈতিক-অৰ্থনৈতিক দিশত বিশ্বৰ ভিতৰতে দপদপাই থকা বুলি সততে প্ৰচাৰ কৰা ভাৰতবৰ্ষই নিজৰ দেশৰ ক্ৰীড়াৰ ক্ষেত্ৰখনক কিয় ইমান গুৰুত্বহীন কৰি ৰাখিছে আজিও!! আনবোৰ দিশত দেশখনক আগুৱাই নিয়াৰ প্ৰচেষ্টা অব্যাহত থকাৰ সমান্তৰালভাৱে ক্ৰীড়াৰ দিশটোকো বিশ্বৰ প্ৰেক্ষাপটত জিলিকাই তোলাৰ বাবে আন্তৰিক প্ৰচেষ্টা আৰম্ভ হ'ব বুলি আমি আশাবাদী।

শুনিবলৈ পাইছো ২০৩৬ চনত ভাৰতবৰ্ষত অলিম্পিক ক্ৰীড়া আয়োজনৰ বাবে গুণা-গঁথা চলিছে। আশা কৰিম তাৰ আগতে মাজৰ সময়খিনিত দেশৰ ক্ৰীড়াক্ষেত্ৰখনৰ সৰ্বতোপ্ৰকাৰৰ উন্নয়ন তথা প্ৰসাৰৰ বাবে লোৱা সময়োচিত পদক্ষেপ পদ্ধতিগতভাৱে কোনো কেৰোণ নলগাকৈ অনতিপলমে আৰম্ভ হ'ব। সপোন এটাই - ইয়াৰ ফলশ্ৰুতিত আমিও সোনকালেই ৰাষ্ট্ৰ সংগীতৰ সুৰে সুৰে বিশ্বৰ আগত মূৰ দাঙি নিজৰ গৌৰৱ গাঁথা গাই যাব পাৰিম।

 

(১২ আগষ্ট ২০২৪/সৰভোগ)

****************

 

'বিদুৰভাই' উপভোগৰ অনুভৱ

'বিদুৰভাই' উপভোগৰ অনুভৱ

মুক্তিৰ দিনটোতে চলচিত্ৰখন উপভোগ কৰাৰ পৰিকল্পনা আছিল ভাইটি জানমণিৰ  সৈতে। পিছে পৰিস্থিতি বেলেগ হোৱাত যোৱা ২৬ জুলাই তাৰিখে সপৰিয়ালে বিদুৰভাই নামৰ চলচিত্ৰখন উপভোগ কৰাৰ সুযোগ মিলিল।

অসমীয়া চলচিত্ৰ চাবলৈ যিসময়ত অসমৰ চিত্ৰগৃহসমূহত দৰ্শকৰ অভাৱ সেই সময়ত #বিদুৰভাই চাবলৈ গৈ অনলাইনত টিকেট আগতীয়াকৈ সংৰক্ষণ কৰা বাবে টিকেট কাটিবলৈ নহ'লেও চিত্ৰগৃহৰ ভিতৰত সোমাবলৈ যোৰহাটৰ চিত্ৰগৃহত শাৰী পাতিবলগীয়া হোৱা কথাটোৱে আৰম্ভণিতে মনত অলপ হলেও সন্তুষ্টি দিলে।

চলচিত্ৰখনৰ বিষয়ে ইতিমধ্যে বহুতে বহু ধৰণৰ আলোচনা কৰিছে। গতিকে বিশেষ আলোচনালৈ নগৈ মনৰ কথা দুটামানহে ব্যক্ত কৰিব বিচাৰিছোঁ। বিভিন্নজনে  ব্যক্ত কৰাৰ দৰে অসমীয়া চলচিত্ৰৰ ইতিহাসৰ পথ পৰিক্ৰমাত এই চলচিত্ৰখনে বৰ বিশেষ কিবা স্বকীয় উপস্থিতি দাবী কৰিব পাৰিব বুলি মইও অনুভৱ নকৰোঁ।  কিন্তু চলচিত্ৰখনৰ কাহিনীৰ মাধ্যেমেৰে পৰিচালক আৰু চিত্ৰনাট্যকাৰে যি এক বাৰ্তা সমাজলৈ আগবঢ়াব বিচাৰিছে, সেয়া আজিৰ সামাজিক-ৰাজনৈতিক পৰিৱেশ-পৰিস্থিতিত অন্য দহজন পৰিচালকে কৰিবলৈ সাহস কৰিব বুলি মই ব্যক্তিগতভাৱে ভাবিব পৰা নাইচোন।

চলচিত্ৰখনত আন নহ'লেও সাধাৰণ যেন লগা আমাৰ চৌপাশে ঘটি থকা বহু সামাজিক অন্যায়, চৰকাৰী আঁচনিৰ দুৰ্নীতি, চৰকাৰী অনুষ্ঠান-প্ৰতিষ্ঠানৰ পঁয়ালগা অৱস্থাৰ কাৰক আৰু নেতা-পালিনেতাৰ দুৰ্নীতি তথা জনতাক টকাৰে কিনাৰ চেষ্টা আৰু এই সকলোৰে মাজত দুলি থকা সমাজৰ নিম্নমধ্যবিত্ত তথা দৰিদ্ৰ শ্ৰেণীৰ জীৱনচক্ৰক ২ ঘন্টীয়া কাহিনী এটাৰ মাজেৰে অতি শক্তিশালী ৰূপত উপস্থাপন কৰিবলৈ সক্ষম হৈছে। সমান্তৰালভাৱে অসমীয়া গ্ৰাম্য সমাজৰ ৰীতি-নীতি আৰু বিশ্বাসকো চলচিত্ৰখনৰ ঠাই বিশেষে উপস্থাপন কৰিছে।

চিনেমাখনৰ সমগ্ৰ কাহিনীটোত আমাৰ সমাজত থকা নানান সমস্যাত পিষ্ট হোৱা, জীৱন-জীৱিকাৰ চিন্তাত নিৰুপায় অৱস্থাত পৰা তথা নিজৰ জীৱনচৰ্যাক উন্নত কৰা সপোন দেখা সাধাৰণ জনতাক বিশেষভাৱে চিনেমাৰ মূল চাৰিটা চৰিত্ৰৰ মাজেৰে অতি সাৱলীল ৰূপত প্ৰকাশ কৰাত পৰিচালক সফল হৈছে। এই চৰিত্ৰ চাৰিটাই পৰিস্থিতিৰ তাগিদাত পৰি কৰা অনৈতিক কামকো আপুনি চিনেমাখন উপভোগ কৰি থাকোতে সমৰ্থন কৰিবলৈ কোনোবাখিনিত বাধ্য হৈ পৰিব।

অসমীয়া চলচিত্ৰ উদ্যোগৰ বাবে আটাইতকৈ উৎসাহজনক বিষয়টো হ'ল - এই চলচিত্ৰখনত অভিনয় কৰা শিল্পীসকলৰ প্ৰসংগটো। আমি সততে দেখা পাওঁ যে গ্লেমাৰ থকা তথা সকলোৱে চিনি পোৱা অভিনয় শিল্পীৰ প্ৰতি থকা দৰ্শকৰ আগ্ৰহেহে বহু সময়ত দৰ্শকক চিত্ৰগৃহলৈ টানি নিয়ে। তাৰ বিপৰীতে' বিদুৰভাই' চলচিত্ৰখনত কেইজনমান নৱাগত অভিনয় শিল্পীয়ে মন-প্ৰাণ ঢালি কৰা অভিনয়ে দৰ্শকৰ মনত সাঁচ বহুৱাবলৈ সক্ষম হৈছে। সমান্তৰালভাৱে সকলোৰে অভিনয় চৰিত্ৰৰ সৈতে খাপ খাই পৰাত ই চলচিত্ৰখনৰ আন এক শক্তিশালী দিশ হৈ উঠিছে।

'বিদুৰভাই' নামটোৰ তাৎপৰ্যক লৈও সামাজিক মাধ্যমত প্ৰশ্ন উঠিছে। কিন্তু তাৎপৰ্য বিচাৰ নকৰাকৈও মোৰ দৃষ্টিৰে এই বিশেষ নামটোৱেও বহু দৰ্শকক চিত্ৰগৃহলৈ মাতি আনিছে।

শেষত ক'বলৈ মন গৈছে যে ২০২২ চনত' বুম্বা ৰাইড' নামৰ অসমীয়া-মিচিং দ্বিভাষিক চলচিত্ৰখনে দেশ-বিদেশত বহু পুৰস্কাৰ লাভ কৰাৰ পিছতো মাত্ৰ ১২-১৫ জন দৰ্শকেৰে আমি চিত্ৰগৃহত উপভোগ কৰিছিলোঁ। সমাজলৈ বিশেষ বাৰ্তা দিয়া এই চলচিত্ৰখন আপুনি উপভোগ নকৰিলে নাই কিন্তু' বিদুৰভাই' উপভোগ কৰি অভিনয়, সংলাপ, কেমেৰা কিম্বা সম্পাদনাত যে বিশেষ নিৰাশ নহয় সেয়া খাটাং।

**************